Text copied!
CopyCompare
Burum-Mindik Bible - Rom kimbi - Rom kimbi 15

Rom kimbi 15:9-26

Help us?
Click on verse(s) to share them!
9Juda nini welen qem neŋgiba malökmö, kantri tosatŋi yeŋön mewöyök yaŋgö ak-kömukömuŋi möta miaŋgöra Anutu möpöseiba malje. Miaŋgö keuŋi mi Buŋa Kimbinöŋ kewö ohoget ahöza, “Miaŋgöra nöŋön kantri tosatŋi yeŋgö sutŋine mala möpöseim gihiba qetbuŋagan sehimapköra liŋet kölakŋam.”
10Miaŋgö keuŋi kun mi kewö jiba ohoget ahöza, “Anutunöŋ Juda nini möwölöhöm neŋgiiga könagesöŋi aka söŋgaimakzin. Kantri tosatŋi iŋini mönö nembuk toroqeba söŋgaiba köiraŋ ala malme.”
11Miaŋgö keuŋi kun mi kewö, “Kian kantrigö kambu pakpak iŋini mönö Kembu möpöseiba malme. Gölme dop maljei, iŋini mönö körek ‘Anutu saiwap!’ jiba liŋet köla malme.”
12Kezapqetok azi Aisaia yaŋön mewöyök miaŋgö keuŋi kewö jii ahöza, “Azi qetŋi Jesi yaŋgö andöjalöŋan mönö sötŋi jula wahöta ambazip gölme dop galöm köl eŋgima. Mewö ak eŋgiiga jörömqörömŋini yaŋgöreŋ ala bauköm eŋgimapköra mamböta malme.” Keu walŋi miaŋön mönö nalö kewöŋe ölŋambuk ahakza.
13Uŋa Töröŋaŋgö ösumŋan mönö naŋgöm eŋgiiga jöröm-qörömŋinan köhöiba pöwöwöm akŋapköra mötzal. Miaŋgöra jörömqöröm Toŋi Anutu yaŋön mönö luai qem eŋgiba sösöŋgai pakpak miaŋön uruŋini kokolak qema. Mewö köuluköbiga ölöp Anutu möt narim waŋgiba oyaeŋkoyaeŋ akingö mamböta malme. Mewö.
14O urumeleŋ alaurupni, nanak eŋgöra kewö möt köhöizal: Iŋini mönö tönpin qahö maljemö, Anutunöŋ yuai pakpak ölöpŋi uruŋine ali kokolak qeiga mötmöt könaŋi könaŋi miwikŋaiba miaŋön ölöp goro qeba kusum aŋgubinaŋgö dop akze.
15Mewö akzemö, töndup keu mi ölum eŋgubapuköra möta mieŋgö könaŋini mi kunbuk köl gulim eŋgizal. Anutunöŋ kalem möriam niŋgiiga miaŋgö qakŋe kinjalaŋgöra mönö awösamkakak qakŋe keu köhöikŋi tosatŋi ohom eŋgizal.
16Miaŋgö könaŋi kewö: Anutunöŋ kian kantri eŋön uruŋini meleŋgetka Uŋa Töröŋan mem sarahim eŋgimapköra mörakza. Mutuk jöwöwöl ohogetka köwakŋan öŋgöi Anutunöŋ söŋgaizapma, miaŋgö dop nalö kewöŋe Anutunöŋ ambazip gölme dop buŋaŋi aketka eŋgeka söŋgaimamgöra awöweŋgömakza. Miaŋgöra Ölöwak Buŋaŋi kantri tosatŋi yeŋgö sutŋine jim sehimamgö jiba nupŋi qakne aliga miaŋgö dop urugö nup galöm aka Kraist Jisösgö welenŋi qemakzal.
17Miaŋgöra Kraist Jisösbuk qekötahöba kinda Anutugö nupŋi membiga qetbuŋa niŋgiiga sileni memba öŋgöba awösamkakak kinjal.
18Kraistnöŋ kantri tosatŋi yeŋön Anutugö jitŋi tem kölmegöra möta sölölöhöba kuŋgum niŋgimakzawi, miaŋön mönö nam köl niŋgiiga keuni jiba ahakmemeni ahakzal. Keu tosatŋi laŋ jim sehisehigö awösamkakakŋi mi qahö ahöm niŋgiza.
19Uŋa Töröŋaŋgö ösumŋan mönö nam köl niŋgiiga aŋgöletot aiwesök kukösumŋinambuk asuhuget. Nöŋön Jerusalem siti mosöta kantriŋi kantriŋi liliköba anda mala mala Yuropkö siti qetŋi Ilirikum miaŋgöreŋ aŋgoral. Mewö gölme dop liliköba Kraistkö Ölöwak Buŋa mi jim asarim eŋgim teköyal.
20Kunöŋ tandö kuŋguiga kunŋan kaba nanŋi miriŋi miaŋgö qakŋe memba mönö keuŋambuk akŋa. Miaŋgö dop kunöŋ Kraistkö keuŋan mötnaripkö tandö lök kuŋgui kinöhi, nöŋön mönö kaba yaŋgö tandö qakŋe töndangöba kinda uruŋini toroqeba möhamgöba mem köhöim eŋgimamgö tököba malal. Urugö nup mutukŋi memba miaŋön aködamuni miwikŋaimamgö kapaŋ köla malal. Miaŋgöra ambazip denike yeŋön Kraistkö qetŋi qahö möta tönpin malgeri, nöŋön Ölöwak Buŋa yeŋgöra jim asarimamgö awöweŋgöba malal.
21Miaŋgö keuŋi Buŋa Kimbinöŋ kewö ohoget ahöza, “Denike yeŋön keuŋi qahö jiget mötkeri, yeŋön mönö mala i ekŋe. Denike yeŋön könaŋi mutuk qahö möta tönpin malgeri, yeŋön mönö mala mi möt asarime.”
22Nup mewöŋan jöhöm niŋgiyöhaŋgöra mönö nalö dop eŋgöreŋ kamamgö osiba malal. Mewö.
23Mewö malalmö, liliköba urukuŋgukuŋgu nup mutukŋi memba gölme pakpak möt eŋgizini, miaŋgöreŋ mi mem teköba malal. Urugö nup mutukŋi memamaŋgö gölmeŋi mi nalö kewöŋe kunbuk qahö ahöza. Mewöyök iŋini eŋgekŋamgö sihimŋi möta malbiga yambu (yara) gwötpuk lök teköyök.
24Miaŋgöra kantri qetŋi Spein anmami, miaŋgö könaŋe mönö eŋgöreŋ kamamgö areŋi ala eŋgekŋamgö jörömqöröm aka kewö mötzal: Eŋgeka embuk sösöŋgai aka borom kun köisirik tatpiga bauköm niŋgigetka ölöp köna toroqeba Spein anmam.
25Mewö mötzalmö, nalö kewöŋe Jerusalem sitigö könagesö sarakŋi naŋgöm eŋgibingöra miaŋgöreŋ anmam. Miaŋgöreŋ andagun eŋgöreŋ kamam.
26Masedonia aka Akaia prowins yahöt mietkö urumeleŋ könagesö kambuŋi kambuŋi yeŋön mönö Jerusalem sitigö ambazip sarakŋi bauköm eŋgibingö keu jöhöget. Anutugö ambazip sarakŋi wanapŋi maljei, mönö yeŋgöra keu jöhöba naluk gwötpuk ketaŋi ala mindirigetka mi membagun anda eŋgimam.

Read Rom kimbi 15Rom kimbi 15
Compare Rom kimbi 15:9-26Rom kimbi 15:9-26