Rom 7:7-19

⁷Adi dac ke ikido8akoban? Kipataigonanan na Coda8inni Inakonige8inan? Ka8in 8ikad kida inendasinanan iidi! Kicpin ega ki tag8agibanin ini Inakonige8inan, ka8in nidagi kikendasin adi ejinag8ag patado8in. Kicpin ega iidi inakonigemagagibanin: “Ka8in kiga mosa8endasina8a kidjipimadizimi8a odaiman,” ka8in nidagi kikendasin e patadian e mosa8endam8agin kodag a8iag odaiman.

⁸Midac apitc ka nodaman ii inakonige8in, na8adj nigi 8i patadinaban, acitc kakina anodj kegon nimadji mosa8endanaban. Kicpin mega ega tag8ag inakonige8in, ka8in 8i patadisi8ag a8iagog.

⁹8eckadj ako, ab8amaci kikendamabanin Coda8inni Inakonige8inan, “8e8enda nipimadizinan” nidinendanaban ako. Midac apitc ka kikendaman adi eji nda8endag Kije Manido, nigi 8i madji patadinaban.

¹⁰Midac maia kagi nibo8an ejinagoziaban. Kije Manido ki migi8e ini Inakonige8inan kidji gi pimadizindjin a8iagon, anic dac mi maia kagi nibo8an apitc ka nodamabanin ini Inakonige8inan ejinagozian.

¹¹Apitc mega ka nodamabanin ini Inakonige8inan, na8adj nigi 8i ani patadinaban. Patado8in dac nigi 8agackibinigon, acitc nigi nisigon, egi nodamabanin ini Inakonige8inan.

¹²Midac Coda8inni Inakonige8inan Kije Manidokag odosemaganon. Kakina pepejig inakonige8in iima ka tag8ag Kije Manidokag odosemagan, acitc min8acin, acitc ki8abadaigonan adi kegi iji k8aiak8adiziak.

¹³Nigi nisigonadog8enan na dac ini ka min8acigin Inakonige8inan? Ka8in 8ikad kida inendasinanan iidi! Tiegodj patado8in kagi nisigo8an. Nigi nodanan ini ka min8acigin Inakonige8inan, misa8adj dac ka8in nidodji nosoneasinan, midac 8edji ki patadian acitc 8edji ki nibo8an. Midac iidi 8edji kikendjigadeg patado8in adi maia ejinag8ag. Ini dac Inakonige8inan 8abadai8emaganon adi epitci madji todamak apitc patadiak.

¹⁴Kikikendananan Kije Manidokag e odjimagagin Coda8inni Inakonige8inan. Nin dac nimotci a8iago8inan, acitc mi maia anokitage8inni ka tibenimagani8idj ejinagozian, e anokitaman patado8in.

¹⁵Ka8in ninisidotasin adi enakamigizian. Ka8in mega nidinakamigizisi adi eji nda8endaman. Tiegodj, eji madjendaman nitodan.

¹⁶Kicpin dac kikendaman enakamigizian adi eji ega nda8endaman, 8abadai8emagan e kikendamanin e min8acigin Coda8inni Inakonige8inan.

¹⁷Midac apitc panaageian, ka8in nin ka todaman. Patado8in ka tibenimigo8an ka todamomagag.

¹⁸Nikikendan ega e tag8ag kegon e min8acig ninikag, e motci a8iago8ian. Ni8i mino ijitcige mega, pekic dac ka8in nikackitosin.

¹⁹Ka8in nimino inakamigizisi adi eji nda8endaman. Tiegodj pijicig nimadji inakamigizinan ka iji ega nda8endaman.