Rom 7:10-21

¹⁰Bwena mene jo abudon anya batanau malen eme ta aseben kohak udu le udu, arile bwe, eme ta idi jo imek.

¹¹Tasah, kandriyen ta karei ma lomondra ndra-in badeh, silahei san tan eme mesekei jo amekes kandriyen ndra-in; eme ya i san le ta batanau malen badeh, karei ma lomondra ndra-in wasai jo ma idi jo imek.

¹²Eme ya, taha kasehek batanau malen ki buku sah bah? Kandriyen ta batanau malen le badeh, ndrabun ma mwasin, ma hawe batanau malen ari ari badeh, ndrabun hawe lewen ma mwasin.

¹³Handru, batanau malen badeh, mwasin labai. Arile, buku sah ja? Lakou mwasin doh bwidi jo imek deh? Bwe, bala buku badeh, bwe! Arile, idoh badeh, asahan na seken ta kandriyen ndra-in badu bolo oda taha mesekei taha tebelese sahou badu bolo batanau malen ma bwidi taha amak. Kindrei le alelei kandriyen ndra-in amekes gok doh, tasah iy aseken kandriyen ndra-in doh keme lewan, ma iri lau katanan buku kandriyen ta karei ma lomondra ndra-in badeh, ndra-in labai.

¹⁴Taha tanan, batanau malen badeh, Kindrei le edeu. Arile jo badeh, ndrala bonyo-ou ta karei ma lomondra ndra-in, tasah jo ba-en hamon ta seken ta Kindrei bwe.

¹⁵Eme ya, jo bala tanan sasah jo amekes bwe. Tasah, kandriyen mwasin ta jo nane kamekes on, jo bamekes bwai. Arile, jo ja aseken kamekes kandriyen ndra-in nane jo samekes on, badeh, jo amekes ai.

¹⁶Eme ya, i buku none jo amekes sasah nane jo bwalek ta amekes badeh, kandriyen tek doh leheya buku budon tek anya ki-in hamon ta sahou batanau malen asehek ta aliy ai.

¹⁷Ya eme jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.

¹⁸Eme jo tanan ta bolo odak badeh, kandriyen mwasin bado aliy bwe. Handru, bolo budon tek, jo aseken ta amekes kandriyen mwasin, arile winiyan bwe, kandriyen ndra-in udu le bolo odak kada-ah.

¹⁹Eme kandriyen mwasin jo nane anya kamekes badeh, jo bamekes bwai; ya, kandriyen ndra-in anya nane jo samekes badeh, jo amekes ai.

²⁰Eme ya, i buku none jo amekes sasah nane jo bwalek amekes, jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.

²¹Ya eme sendrehendreh ta aliy i buku doh: Jo anya kamekes kandriyen mwasin badeh, kandriyen ndra-in nane udu bolo odak kodo-on aliu jo amekes le kandriyen ndra-in ja.