Rom 5:5-14

⁵Ra dat kis langlang nama nurnur, dat tasmani lena a utna ra o God i sa uliliman taru uni in nanpat ut. Uni o God i sa pitar tar a Tokodos na Nion tandat. Ra a Tokodos na Nion i sa lingis tar a marmaris anun o God unin balandat.

⁶Numugu ka dat mur a petutna ra i wakak umatan o God, ra ka dat pet sot pas tu utna. Ikut ra a du bung i sot, o Karisito i mat sur dat.

⁷I ngangitin doko ra taio in mat sur tu tokodos na musano. Kutiro taio in pet lar pasi sur in mat sur tu wakak na musano.

⁸Ikut o God i ese anun a marmaris torom dat una kisapi lenri: Ra dat laun utmakai una sakino petutna, o Karisito i mat sur dat.

⁹Ma una gapin o Iesu, o God i watung dat lena dat tokodos umatano. I mo ra i lingmulus sakit lena, o Iesu in ulaun pas dat gusun a kankan anun o God, una bung na warkurai.

¹⁰Ra dat kis na ebar utmakai nam o God, i tulu ru o Nutunu sur in mat sur dat, sur dat in emarom melet nam o God. Ra dat kis na emarom nam o God, i lingmulus sakit, in ulaun pas dat, kibino una nilaun anun o Nutunu.

¹¹Awu sur i kut ra. Uniri dat gas utkai tomo nam o God, kibino ut una nundat a Labino o Iesu Karisito, ra i umarom tomo tar dat nam o God.

¹²Ara musano kut i pam a sakino petutna, ma una petutna ra, a sakino petutna i wanpat una rakrakon bual. A sakino petutna i pam pat a minat. Ma una kisapi ra, a minat i wan sur a taro rop, uni det rop det pam a sakino petutna.

¹³Uni numugu, ra kabaut o God i pitar a kum Warkurai, a sakino petutna i sa kis una rakrakon bual. Ra kalako Warkurai, o God ken takun taio lena i pam a sakino petutna.

¹⁴Ikut, tagun a kum kilalo anun o Adam tuk una kum kilalo anun o Moses, a taro rop det kis utuntudu ina dekdekin a minat. Ara taro ka det pam a ngas na sakino elar nam o Adam, ra i lakai a warkurai. Ikut, det utkai, det kis utuntudu ina dekdekin a minat. O Adam i a malalarin o naro ra in nanpat numur.