Rom 5:1-21

¹Ana nundala tortorot ot, e God ka atong dala mang dala tostos namatana. I maining dala kes na bal molmol taum o e God, anasa ana nundala Leklek e Iesu Karisito.

²Ana nundala tortorot, e Karisito i nigon dala pa i akas dala ana marmaris ane God. Pa onone, dala ka laun onoi. Pa dala gas, ning dala harnanai ana tortorot sur a matatar ane God, ning dalar kes onoi lamur.

³Bel i ka i ning, dala gas otleng ana mamahatla ning dala kilangi, anasa dala tasmani mang a mamahatla i tol otnan anundala tuntunur rakrakai.

⁴Pa anundala tuntunur rakrakai i tol otnan a ngas a lalaun ning a larlarla bel lar apungan pas dala. Pa a ngas a lalaun ne, i tol otnan anundala keskes na harnanai ana tortorot sur asaning e God ir toli lamur.

⁵Ning dala harnanai ana tortorot, dala tasmani mang asaning e God ka lele tar onoi ir hanot ot. Anasa e God ka saran tar a Talngan Tabu tan dala. Pa Talngan Tabu ka pek tar a marmaris ane God te na balandala.

⁶Lanigo bel dala lotu tetek e God, pa bel dala tolsot pas ta utna. Ika ning a pukakiar i sot, e Karisito i mat sur dala.

⁷I rakrakai kol ning tik ir mat keles ta tostos a barsan. Ngandek tik ir tolsot pasi sur ir mat sur ta wakak a barsan.

⁸Ika e God i asangan anuna marmaris tetek dala larne: Ning dala laun ot ana toltol laulau, e Karisito i mat sur dala.

⁹Pa ana sulukna e Iesu, e God i atong dala mang dala tostos namatana. Manglarning dala tasman momoli mang e Iesu ir alaun pas dala kusun a balakut ane God ana pukakiar a warkurai.

¹⁰Ning dala hirua ot taum o e God, i dat dala sur dalar armoro ulak taum onoi, anasa ana minat e Natnalik. Pa onone, ning dala ka armoro taum o e God, dala tasman momoli mang ir alaun pas dala otleng, anasa ana lalaun ane Natnalik.

¹¹Bel i ka i ning, dala gas otleng o e God, anasa ana nundala Leklek e Iesu Karisito, ning ka amoro taum tar dala o e God.

¹²Takai ka barsan, i tol a toltol laulau, pa a toltol laulau i hanot te na rakrakan hanua. A toltol laulau i tol otnan tar a minat. Pa ana ngas ka ning, a minat i han tetek a tarai rop, anasa la rop la tol a toltol laulau.

¹³Anasa lanigo, ning e God belot i saran a Warkuraila, a toltol laulau ka kes te na rakrakan hanua. Ning bel ta warkurai, e God bel ir arup tik ana toltol laulau.

¹⁴Ika turpasi o e Adam tuk ana raula ning e Moses i laun, a tarai rop la kes nahai a rakrakai ana minat. Dingla na tarai bel la tol a ngas a toltol laulau arlar o e Adam, ning i kutus a warkurai. Ika a minat i umkol la otleng. E Adam i arlar ana manar a barsan ning ir hanot lamur.

¹⁵Ika a artabar ane God bel i arlar ana toltol na kutus warkurai ane Adam. Anasa galis a tarai la mat ana toltol na kutus warkurai anuna takai ka barsan. Ika a marmaris ane God i itna kol pa i pulpulas, pa ana takai ka barsan, e Iesu Karisito, pa ana nuna marmaris, i saran oros tar ka a artabar tetek a galis a tarai.

¹⁶Ning a utna otleng, a artabar ane God bel i arlar ana utna ning i hanot miting na toltol laulau ane Adam. Anuna toltol ot ning i dat tar a tarai, sur lar hirua ana warkurai a arkeles ane God. Ika a artabar ane God i mange, ning a tarai la kutus warkurai a galis a taem, e God i maris kol la, pa i atong la mang na tena tostos.

¹⁷Pa ana toltol na kutus warkurai anuna takai ka barsan, a tarai rop la kes nahai a rakrakai ana minat. Ika, i momol kol, la ning la kibas pas a tnan marmaris ane God ning i bukus, pa la kibas pas anuna artabar ning i atong la mang na tena tostos, lar laun tikin pa lar hanot a tena warkuraila arlar ana kingla, anasa ana takai ka barsan, e Iesu Karisito.

¹⁸I maining ana takai ka toltol na kutus warkurai ane Adam a tarai rop la ka kes ana warkurai na arkeles ane God. Larotleng ning ana takai ka tostos a toltol ning e Iesu i toli, e God ir atong a taraila rop mang la tostos namatana, pa lar laun.

¹⁹Pa ana tabun longor anuna takai ka barsan, e Adam, a galis a tarai la na tena laulau. Larotleng ning, ana longor anuna takai ka barsan, e Iesu Karisito a galis a tarai la na tena tostos.

²⁰E God i saran tar a Warkuraila, sur ir talapor mang a toltol na kutus warkurai anuna tarai i itna amon. A toltol laulau i itna amon, ika a marmaris ane God i itna bolosi.

²¹A tarai rop la kes nahai a rakrakai ana toltol laulau, pa i saran a minat tetek la. Ika onone, la ning la kes nahai a rakrakai ana marmaris ane God, e God i atong la mang la tostos namatana, pa i saran a lalaun tikin tetek la, anasa ana tostos a titol ning e Iesu Karisito anundala Leklek i tol tari.