Rom 3:7-18

⁷Ka kadu aitam onoto mwagemwagena yana ipupu deina, “Aituhu tomotau yau vitupu inononi, ka aituhu yau vitupu Yaubada yana vona ainua ibou‑viwavei, akaka dewana wayahina memeanina wayahia idudueyei Yaubada yana vona vivane tunutunuhina. Wayahina, aituhu Yaubada didigana avo‑vi‑natei deina, medeina Yaubada ivona vivane yauke tauna a havia?”

⁸Yaiau, tau vitupu tupwai imana‑giboeu ka ivonavona vivane yauke, Paulo, aipuipupu deina. Taui ivonavona, “Paulo vonavona, ‘Yaiau, nau‑wawanika dewa goyona kadewa‑nubunubui, e apaina dewa ahiahina vinꞌ‑omo yaka dewa goyona wayahina akanai.’” Ia! Vonana vitupu ananina. Apaina Yaubada tomotaui na‑dewa‑yaiyaiei, kadu dewa‑yaiyaina ivaniahei yai ipupuna wayahina akanai.

⁹Wayahina, yau vonana anꞌ anamana medeina? Kaiwadi, itoka me Iudea yawaika taui eha me Iudea yawai ivane‑tawanei, o eha? Yaiau, avonemi eha! Iuna goyona itoka tomotau habuhabuka bagibagi‑tawaneka, kadu goyona veimeyeka kavi‑ateteyei, tauka me Iudea kadu taui eha me Iudea.

¹⁰Kadu Iginuma ivona deina, “Eha aitam tomotau yana dewa tunutunuhina Yaubada matana,

¹¹ka kadu eha aitam tomotau ta‑nua‑hau, ka kadu eha aitam tomotau Yaubada ta‑nenene.

¹²Tomotau habuhabui avaha Yaubada ini‑tawanei, ka habuhabui etawana goyona ivi‑nua‑dadani, ka eha aitam wayahia yana dewa ahiahina, eha aitam.”

¹³“Taui yai ipupu deina, ka vona vitupu meaia vinꞌ‑omo‑nananena,” “kadu vona honahonana epunaia vinꞌ‑omo‑nananena, mwata yai pohavu deina,”

¹⁴“Bwanata manimaninina awai nau‑vi‑anai.”

¹⁵“Taui ivo‑kwayavoni tomotau ivunui inau‑vi‑anigi.

¹⁶Kadu aveta baina ineine, akanai vita‑vovona kadu inahe natanata mani tomotau wayahia.

¹⁷Taui nua gomagomanina a etawana eha itꞌ‑anamane, kate vi‑naua ana heta a etawana ianamanei,”

¹⁸“kadu taui eha Yaubada imatamataute.”