Rom 3:6-30

⁶Masigoc. Anôtô embe enseŋ tau amboac tonaŋ, oc êmêtôc ŋamalac samob nêŋ biŋ êtu katô amboac ondoc.

⁷Ma amboac ondoc. Ŋoc biŋdansaŋ embe êwaka Anôtônê biŋŋanô sa e ênê ŋawasi êsa êlêlêc su, naŋ eŋ oc êmêtôc aê amboac ŋac sec teŋ me.

⁸Embe amboac tonaŋ, go tasôm biŋ alôb-alôb gebe “Daŋgôm secmaŋ, gebe sec ênam ŋanô ŋajamôŋ.” Tasôm amboac tonaŋ me. Lau ŋagêdô sêgôliŋ biŋ kêpi aêac ma sêsôm gebe aêac asôm ŋalô tau tonaŋ. Lau tonaŋ oc sêndac nêŋ mêtôc naêndêŋgeŋ.

⁹Amboac ondoc, aêac Juda atap moasiŋ ŋajam sa êlêlêc su me. Masianô. Aêac asôm sugac gebe Juda to lau samuc samob sêsô sec ŋaŋaclai ŋalabu,

¹⁰kêtôm teto gêc gebe “Ŋac gêdêŋ teŋ gêmoa atomanô.

¹¹Ŋac tokauc teŋ gêmoa atom, ma ŋac gesom Anôtôŋa teŋ gêmoa atom.

¹²Samob sêkac tauŋ su e têtu sec samobgac. Ŋac têtac wapômŋa teŋ gêmoa atom, masi samucgeŋ.

¹³Êsêacnêŋ aweŋsuŋ kêtôm sêawa gêŋa. Imbeleŋ geno-geno biŋdansaŋ e ŋawasi laŋgwageŋ. Gêdôŋôlic kêsabaŋ moac ŋamalic auc.

¹⁴Aweŋsuŋ kêpuc boa ŋawaô ma biŋ ŋaclai gêjam auc.

¹⁵Sêlêtigeŋ gebe sêkêc dec siŋ.

¹⁶Êsêacnêŋ lêŋ kepeŋ senseŋ gêŋ popocŋa ŋawaô to sêŋgôm launêŋ ŋalêlôm ŋawapac êsaŋa,

¹⁷ma sêjam kauc lêŋ sê wamaŋa.

¹⁸Êsêac sêkô Anôtô laŋônêm, mago têtêc eŋ atom.”

¹⁹Aêac tajala gebe biŋ samob, taŋ biŋsu kêsôm naŋ, kêkanôŋ êsêac, taŋ sêmoa biŋsu ŋalabu naŋ. Biŋsu êmbôc êsêac aweŋ auc ma ŋamalac samob sêjala nêŋ keso, taŋ sêgôm gêdêŋ Anôtô naŋ, gebe

²⁰Anôtô kêmasaŋ ŋamalac samob nêŋ biŋ e gêlic êsêac têtu lau gêdêŋ kêtu ŋamalac sêgôm biŋsu ŋanô kêsaŋa nec atom. Biŋsu ŋakoleŋ tageŋ tonec gebe êtôc aêacnêŋ sec ênêc awêgeŋ êndêŋ aêac.

²¹Galoc lêŋ tec Anôtô kêsa gebe êmansaŋ ŋamalacnêŋ biŋ e êlic êsêac têtu lau gêdêŋ, mêŋgeoc tau lasê. Geoc tau lasê kêpi biŋsu ŋalêŋ atom. Mose tau nê biŋsu to propete sêwa biŋ tau sa.

²²Anôtô kêmasaŋ ŋamalacnêŋ biŋ e gêlic êsêac têtu lau gêdêŋ naŋ gêgôm kêtu sêkêŋ gêwiŋ Jesu Kilisiŋa. Êsêac samob, taŋ sêkêŋ gêwiŋ Kilisi naŋ, têtap moasiŋ tonaŋ sa kêtômgeŋ,

²³gebe ŋamalac pebeŋ sêgôm sec tec sêjac jaê Anôtônê ŋawasi.

²⁴Mago Anôtô kêmoasiŋ êsêac to kêmasaŋ êsêacnêŋ biŋ e gêlic êsêac têtu lau gêdêŋ ŋaômageŋ, gêgôm kêtu Kilisi Jesu kêsi êsêac suŋa.

²⁵Anôtô tau kêkêŋ Kilisi kêtu da wamaŋa gebe ênê dec enseŋ lau, taŋ sêkêŋ gêwiŋ eŋ naŋ, nêŋ sec su. Biŋ tonaŋ gêwa Anôtô kêmasaŋ ŋamalacnêŋ biŋ e gêlic êsêac têtu lau gêdêŋ ŋalêŋ sa. Gêdêŋ têm gêmuŋŋa Anôtô gê ŋamalacnêŋ biŋ tôŋ ma gêwi nêŋ sec ŋabiŋ siŋ gêcŋa.

²⁶Mago galoc Anôtô gebe êwaka lêŋ kêmasaŋ ŋamalacnêŋ biŋŋa sa, ec tajala gebe eŋ ŋac gêdêŋ ma kêmasaŋ lau, taŋ sêkêŋ gêwiŋ Jesu naŋ, nêŋ biŋ e gêlic êsêac têtu lau gêdêŋ.

²⁷Ma aêacnêŋ waeŋ tau gêc ondoc. Waeŋ tau gêbacnêgac. Biŋsu amboac ondoc geseŋ su. Biŋsu taŋ kêjatu aêac gebe tanam koleŋ me. Masianô. Biŋ takêŋ gêwiŋŋa.

²⁸Aêac tajala biŋ tonec kêtu tôŋ gebe Anôtô kêmasaŋ ŋamalacnêŋ biŋ e gêlic êsêac têtu lau gêdêŋ kêtu sêkêŋ gêwiŋŋageŋ, kêtu sêjam biŋsu ŋakoleŋŋa nec atom.

²⁹Anôtô kêtu Juda tauŋgeŋ nêŋ Anôtô me. Eŋ kêtu lau samuc nêŋ Anôtô gêwiŋ atom me. Aec, lau samuc nêŋ gêwiŋgoc.

³⁰Anôtô tageŋ, tec êmansaŋ Judanêŋ biŋ e êlic êsêac têtu lau gêdêŋ êtu sêkêŋ gêwiŋŋa ma êmansaŋ lau samuc nêŋ êtu sêkêŋ gêwiŋŋa amboac tonaŋgeŋ.