Rom 3:2-27

²Mangoro na magit dia boina tana; ma go ia ra luaina, ba di ga nur tar ra tinata kai God ta diat.

³Ma dave, ona ta ra na ta diat pa dia ga nurnur? Na pak laka tana ra dovotina kai God, tago dia ga ko iba upi ra nurnur?

⁴Koko muka! Maia pa, boina ba na po rikai ba God i dovot ma ra tarai par dia vaongo; da di ga tumu ia dari: “Upi na po ba i dovot kaum lavur tinata, Ma upi una ongaongor ona u vana ta ra varkurai.”

⁵Ma ona kada mangamangana ba pa i takodo i vaarike ra mangamangana takodo kai God, ava dat a tatike? Kan God pa i takodo bar, ona na babali na kankan ta dat? (Iau tata da ra mangamangana kai ra tarai.)

⁶Koko muka! Damana, God na kure davatane ra rakarakan a gunagunan?

⁷Ma ona ra dovotina kai God i tar manga arikai ma i tar vangala pa kana minamar ta go kaugu vavaongo, ta ra ava di kure mule iau, da iau a tena varpiam?

⁸Ma pa i dari laka (da di vaongo pa avet, ma di biti ba ave tatatike): Dat a pait ra kaina magit, upi ra bo na magit na arikai tana? Ma ra varkurai na balbali i tadav diat i takodo muka!

⁹Ava mulai? Da manga boina laka ta ni diat? Patana, vakir ure ta magit; tago lua da ga takun ot pa ra umana Iudaia ma ra umana Elenas bula ma ra varpiam;

¹⁰da di ga tumu ia dari: “Pa ta tikai i takodo, vakir ta tikai ka;

¹¹Pa ta tikai matoto, Pa ta tikai i tikan upi God;

¹²Diat par dia tar vana rara, diat par pa dia boina ure ta magit; Pa ta tikai i pait ta bo na magit, patana, vakir ta tikai ka;

¹³A kongkong i diat i da ra babang na minat i tapapa; A karamea i diat i tar tatata na vavagu; A taring, da kai ra vui i varvarpidik, i ki ra vavai ra bul na ngie i diat;

¹⁴A ngie i diat i buka ma ra varvul ma ra tinata i mapak;

¹⁵A kau i diat i vutvut upi ra vardodoko;

¹⁶A vinirua ma ra uliran i tur ta kadia lavur nga;

¹⁷Ma pa dia ga nunure ra nga i ra malmal;

¹⁸Pa ta bunurut ure God i tur ta ra luaina mata i diat.”

¹⁹Ma da nunure muka go, ba ra lavur magit par a tinata na varkurai i tatike, i tatike ta diat dia tur ta ra vavai na tinata na varkurai; upi na paum bat ra ngie i diat par, ma upi na arikai ba ra rakarakan a gunagunan i rara parika ta ra mata i God;

²⁰tago ure ra tinorom ta ra tinata na varkurai pa da vatakodo ta tikai ta ra luaina matana; tago ra tinata na varkurai i vakabara dat ure ra varpiam.

²¹Ma go ra varvatakodo kai God, nina ba pa i vuna ta ra tinata na varkurai, i tar vana rikai, ma ra tinata na varkurai ma ra lavur propet diat tar varvai dovot i tana;

²²a varvatakodo kai God iat ta ra nurnur tai Iesu Kristo kadiat par dia nurnur; tago pa dia enana varbaiai;

²³tago diat par dia tar varpiam ma dia iba upi ra minamar i God,

²⁴di vatakodo vakuku diat ta kana varmari iat ure ra varkul na varvalaun kai Kristo Iesu;

²⁵nina ba God i ga vaarike tar ia upi a varporong, ure ra nurnur ta ra gapuna, upi na vaarike ra takodo na varkurai kai God, tago i nur vue ke boko ra lavur varpiam dia tar pait ia amana ta ra kini na varvamadudur kai God;

²⁶iau biti upi na vaarike go gori kana takodo na varkurai; upi ia iat na takodo ma na vatakodo bula nina i nurnur tai Iesu.

²⁷Akave la ta magit ba dat a vavagia pa dat i tana? Di tar kure vatukum vue. Ta ra varkurai ava? Ure ra varkurai na papalum vang? Patana; ure ke ra varkurai na nurnur.