Rom 3:17-21

¹⁷Hanip gur guragur manap gosham yah hat paten da oh hanhan hat pati ohoh ihan gurangur yah hat paten dahe timbasnapmur.

¹⁸Gur Got norhe kintei moh norhornong kasna hatin oh eimat timbas hat pati han bap gurmur. Got orhor giritporhan brak matpamur.

¹⁹Dir dahat patimur. Got oh ritporhan ma brak matpa meng oh ama sawa meng ohe hrepnong hat pati han dire boknong naham ritporhan brak matpa ma hapat dahaptimur. Ihtin ohoh ihan Got oh kuuhan bap mong mong ma pati bap gonsi dirnong Gur er hat pati bapmur ma naporpat oh dir tit han tit Nohri yahnap hanmur ritin ina hat patda. Basra. Eimat timbasnap na ritin ina hat patimur.

²⁰Got ohe sawa meng ma natip oh hanip dir saptidapat er hayahanoh Epe. Noh gin er hah sa daham ha am hatingwe rim natipmur. Orhe imat natip sawa mengnong oh hanip dir eimatnap na dimtin inasi hat patimur. Dir ihat pati ohoh ihan dir dimtiperhanhe Got oh Gur yah han bapmur na naporpatmur.

²¹Got ohe sawa meng ma dindeipti ohe pe oh Gur yah hanmur na naporpat orhora; tit gure boknong Gur yah han bapmur napotin kat ma namgitip kat oh patmur. Ama yah hanmur napotin ohe kat ma namgitip oh orhe sawa mengnong dindeipti ohe pe oh na namgitipmur. Ama namgitip kat oh rih propeto Moseso ire sawa mengtei Kaput Got oh Gur yah han bapmur napotin kat oh pat hatipramur rishe kat oh gin mama pat ohmur.