Rom 2:2-14

²Nge kich sia silei pwe Kot a wenechar lupwen a apwüngü ekewe aramas mi föri ekei sokun föför.

³Nge en pwii, ka püsin föri ekei sokun föför ka apwüngü ekoch won! Ifa usun, ka ekieki pwe ka tongeni sü seni än Kot apwüng?

⁴Eli ka turunufasei an kirikiröch mi fokun lapalap, an songomang me tongotam! Kosap mefi pwe än Kot kirikiröch a mochen emwenuk ngeni ekieksefäl?

⁵Nge lelukom a tipepöchökül o ülöförea. Iei mine ka püsin alapala om liwiningau lon ewe rän lupwen Kot epwe pwärala an song me an apwüngüwen.

⁶Pun Kot epwe liwini ngeni aramas meinisin liwinin ar föför.

⁷Ekoch aramas ra likitü lon ar föför mürina, ra kütta ling me iteüöch me ewe manau esap müchüla. Iwe, Kot epwe ngeniir manau esemüch.

⁸Nge pwal ekoch ra chök kütta püsin feiöchür, ra oput mine a let o ra föri mine ese pwüng. Iwe, Kot epwe tinatiu an song me lingeringer wor.

⁹Epwe wor osukosuk me riaföü epwe tori aramas meinisin mi föri mine a ngau, akomwan epwe tori ekewe chon Juta, nge mürin epwe pwal tori ekewe chon lükün Israel.

¹⁰Nge Kot epwe ngeni chokewe mi föri mine a mürina ling me iteüöch me kinamwe, akomwan ngeni ekewe chon Juta, nge mürin ngeni ekewe chon lükün Israel.

¹¹Pun Kot esap lifilifil aramas lon an apwüngüür.

¹²Iwe, ekewe chon lükün Israel esap wor rer än Moses kewe Allük, ra tipis o pöütmwälila, inamwo ika esap wor rer ekewe Allük. Ekewe chon Juta a wor rer ekewe Allük. Ra tipis o küna apwüng ren mine a mak lon ekewe Allük.

¹³Pun ekewe aramas resap küna pwüng mwen mesen Kot ren ar rongorong ngeni ekewe Allük, nge ren ar apwönüetä pwüngün ekewe Allük.

¹⁴Ekewe chon lükün Israel esap wor rer ekewe Allük. Nge iteiten fansoun ra föri pwüngün ekewe Allük ren mefien letiper, ra pwärätä pwe ra silei met repwe föri ika resap föri, inamwo ika esap wor rer ekewe Allük.