Text copied!
CopyCompare
Yai Wɨn Kɨbiya - Rom - Rom 2

Rom 2:12-20

Help us?
Click on verse(s) to share them!
12Iikamɨm Juda iikam tani mɨ sɨma Adi Komii siir siyɨu komii ɨiir bɨ nɨnoknɨnkɨnkɨm mɨ sɨma siyɨu biyɨe ha tɨrkɨm mɨ Adi Komii siya sɨmiirɨn wɨ hɨriinansi nwo rani. Nɨɨngaka. Siya sɨmiirɨn wa nonkwobumbunɨnkɨn haigɨnɨuwi. Mɨ Juda iikamɨm sɨmiirɨn nɨɨngaka. Sɨma Adi Komii siir siyɨu ɨiirɨn ɨna nɨnoknɨnkɨnɨm mɨ sɨma siyɨu biyɨe ha tɨri mɨ Adi Komii siya sɨmiirɨn wɨ tɨ siyɨu ɨiirsi boɨnwokiyop natkaigi.
13Iikamɨm Adi Komii siir yai aiirɨn hindara wakae kimaigiyɨm mɨ Adi Komii siya sɨmiirɨn wɨ ha boɨn tani, sɨma iikam mɨiyɨkɨm. Nɨɨngaka. Iikamɨm siyɨu komii ɨiir wakaeyokna apiyɨm, tɨ hɨriinan iikamɨm sɨmasɨmargɨm Adi Komii siya nɨkɨuwanɨm iikam mɨiyɨk.
14Mɨ iikamɨm Juda iikam tani, tɨnda tɨnda nwowɨm, Adi Komii siir siyɨu ɨiir nɨnoknɨnkɨn karam nwowɨm, sɨma dimɨnɨn sɨmiir kwoɨnkar naɨngwokiyɨn, pɨ siyɨu mɨiyɨk siirar mɨ tɨri. Adi Komii siir siyɨu komii ɨeya boɨna saiir hɨriinan siyɨuɨn, yɨo krɨmiir nɨisiimauugɨn. Mɨ yɨm sɨma ɨna nɨnoknɨnkɨnɨm, pɨkɨ hɨnɨɨn dimɨn ɨkɨ wadɨeyɨn mɨ pɨkɨ hɨnɨɨn dimɨn ɨkɨ biyɨeyɨn.
15Mɨ siyɨu hɨriinanɨn sɨma tɨrɨn yɨo sɨmiir kwoɨnauɨn Adi Komii siir siyɨu komiiyɨn ini hanɨɨn siya bɨdi kwɨrii ɨdwokaiyɨn. Mɨ sɨmiir kwoɨn ɨeyar nɨisiimauuwi, pɨkɨ hɨnɨɨn dimɨn ɨkɨn wadɨeyɨn mɨ pɨkɨ hɨnɨɨn dimɨn ɨkɨn biyɨeyɨn. Mɨ hɨriinankɨ nɨuwi, sɨmiirɨn ɨni sɨmiir kwoɨn ɨeyar nowomwarkaiyɨuɨm.
16Mɨ mhoɨiya ɨi komiiya, yaimɨn dimɨn ɨmiir hɨdana Adi Komii siya wɨ Jisɨs Krais siir boɨnkii, tɨ kwoɨnpai kwoɨnpaiyɨm, iikamɨm hɨnda tɨndanɨm sɨmiir kwoɨnau kwɨrii ɨdwokaiyɨm, sɨmiir kɨnawhiyɨmiyɨe ɨtkɨkɨnam. Mɨ siya sɨmiirɨn wɨ tɨ digworaekwo ɨmiirsi boɨnwokiyop natkaigi. Mɨ tɨ digworaekwowɨm, sɨma wa nɨmbiyami mɨ Adi Komii siir yai wɨn kɨbiya kara boɨnmɨmauuwiya saeya ta hɨriinan yaigaka.
17Juda iikam sɨma ha naɨngwowi, Adi Komii siya mɨ kɨma, kɨma ɨrɨpar nongwomamaɨr aeikɨm. Mɨ kɨmiir kwoɨnɨm ha naɨngwowi kɨmiir bopwowa paekɨ bɨ namai ɨkougɨn mɨ Adi Komii siya tɨ siyɨu komii siir yaiyɨm kɨmiir hauugiyɨm mɨ kɨmiirɨn wɨ siya whɨnkɨnsiis haigɨnɨuwi, aniya? Nɨɨngaka. Mɨ kɨma kɨmiir inɨg ɨmiirar hainaniyɨm, kɨma pɨ ha boɨni, nɨm krɨma Adi Komii siir iikamkɨm.
18Kɨra Adi Komii siir kwoɨn ɨiirɨn siir bɨdi yɨnoknɨnkɨnɨm. Mɨ kɨra ɨna hɨd nɨnoknɨnkɨnɨn pɨkɨ hɨnɨɨn dimɨn ɨkɨn biyɨeyɨn mɨ pɨkɨ hɨnɨɨn dimɨn ɨkɨn mɨiyɨkɨn, kɨra siyɨu mɨiyɨk ɨiirar napikɨn. Dimusi rani, sɨma kɨriirɨn Adi Komii siir yaiya yɨnisɨmar nowomwarkaiyɨukɨn.
19Kɨma hɨnɨɨna naɨngwowi, Adi Komii siir yaiya kɨma saiirɨn nɨnoknɨnkɨn mɨiyɨkakɨm mɨ kɨma iikamɨm habwowhaenan nwowɨm sɨmiir aknaɨnan nɨisiimauuwam mɨni Adi Komii siir yai mɨiyɨka saiirɨn, ha? Mɨ kɨma siyɨu mɨiyɨkɨn siir nɨisiimauuwam mɨni mɨ sɨma kɨmiir nwokɨ wakaeyoknam.
20Kɨma hɨnɨɨna naɨngwowi kɨma dɨgar nwowi, iikamɨm habwhaowaenanɨm sɨmiir nowomwarkaiyɨuwɨm Adi Komii siir dimɨn mɨiyɨkɨm sɨmiir, ha? Mɨ kɨma iikamɨm yɨnisɨm sapɨsapnan Adi Komii siir dimɨn mɨiyɨkɨm sɨmiir nowomwarkaiyɨuwam mɨni mɨ kɨma sɨmiir sɨbgu owomwarkaiyɨuwamar naɨngwowi Adi Komii siir dimɨn ɨmiirɨn. Dimusi rani, kɨma hɨnɨɨna naɨngwowi Adi Komii siir yaimwokɨyaimwowa saiir bɨdi yɨnoknɨnkɨnkɨɨnɨn. Mɨ sɨma wɨ kɨmiir hɨriinana nwokɨ owɨm, ha?

Read Rom 2Rom 2
Compare Rom 2:12-20Rom 2:12-20