Rom 1:5-18

⁵O e Karisito ot, e God i maris mila pa i saran a titol na aposel tetek mila, sur milar aleklek pas a risana. Mila sira warawai tetek a tarai rop ning bel na tarai Juda, sur lar tortorot pa lar longor onoi.

⁶Mulo otleng dingla na tarai tagun la, ning e God ka kabah pas mulo, sur mulo ane Iesu Karisito.

⁷A tumus a pas ne tetek mulo rop ting e Rom, ning e God i maris mulo pa i kabah pas mulo sur mulo anuna taraila. A marmaris pa bal molmol tetek mulo ta e God a Tamandala pa tana Leklek e Iesu Karisito.

⁸Ine a ningnigo na utna, ana risana e Iesu Karisito, a atong wakak tetek anuka God o mulo rop, anasa a tarai te na rakrakan hanua rop la warwara talapor ana numulo a tortorot.

⁹A titol tetek e God ana nuka lalaun rop, ning a warawai ana Wakak a Warwara o e Natnalik, pa e God ot i tasmani mang a sira nuk pas mulo

¹⁰ana nuk a nunungla ana taemla rop. A nunung otleng mang, ning a nuknuk ot ane God, ngandek ono bot ne ir sapang anuka ngas sur ar han tetek mulo.

¹¹A mang kol sur ar oroi mulo, sur ar tabar mulo ana artabarla, ning ir nangan a ingumulo, sur ir arakrakai mulo.

¹²Manglarning, ning ar oroi anumulo a tortorot, pa mulo otleng mulor oroi anuka tortorot, dalar arakrakai artalai dala.

¹³Na tastasikla, a mang sur mulor tasmani mang, a galis a taem, a mang sur ar oroi mulo, sur ar nangan mulo par oroi a wana nuka titol ting na numulo a lalaun, larning a oroi ting na lalaun ana maskan a tarai, ning la otleng bel na tarai Juda. Ika, tuk onone, bel a han lar pas.

¹⁴Anuka titol ot ning e God i saran tari tak, sur ar warawai tetek a tarai ning la tasman a warwara Grik pa tarai otleng ning bel la tasmani, tetek na tena tastasim pa la ning anunla tastasman bel i itna.

¹⁵Ine a kamkamna ning a mang kol sur ar warawai ana Wakak a Warwara tetek mulo otleng tumo e Rom.

¹⁶Bel a meme ana Wakak a Warwara, anasa i a rakrakai e God sur ir alaun pas a taraila rop ning la tortorot. Tetek mila a tarai Juda nigo, pa onone tetek mulo otleng ning bel na tarai Juda.

¹⁷Anasa a Wakak a Warwara i apuasa a ngas ning e God i toli, sur a tarai lar tostos namatana. A ngas ning, a tortorot ka. A tortorot sot ka miting na kamkamna tuk ana araropna. Larning di ka tumus tari ting na Buk Tabu mange, “Esining i tortorot, e God ir atongi mang a tena tostos pa ir laun.”

¹⁸E God i apuasa anuna balakut misaot na langit, tetek a tarai ning bel la hanrawai e God pa la tol a laulauna, pa ana nunla na toltol laulaula, la sairas a momolna.