Rom 1:3-28

³Sahou mwasin doh badeh, ta nyala nadun, ya iy badeh, saren tiye iy asahan ta lundriye tubun Debit.

⁴Na len Kindrei mete-ei iy amak eme loken ja, Malawin Mwasin ta Kindrei leheya taha buku, Kindrei atehei nyosowan i la-un, ma hawe boto-on i tan ta atondrok lakou tan mari. Iy badeh, Laban Jises Krais.

⁵Na iy le badeh, Kindrei atehei lahou dah eme kani aso, ma iy atehei seben eme taso ale, eme ma aso asahan aposel i nyara Krais ta atiye sahou, hawe kaliu iri lau badu kon leheleh mari kanuhun sahou, ma katehei budon tiri handru ki ta Kindrei.

⁶Sahou doh badeh, ewek taha lau manyah ado Rom ale. Aha ndranuhun iri lau atiye sahou ta Kindrei ewek taha, ma Kindrei ndraluwi aha ndrame lau ta Jises Krais.

⁷Eme ya, jo Pol amwenen atorou la-ukei dah badeh, ewek taha lau mwan ma badih mari badu Rom, ala mene Kindrei aseken aha labai, ma ndraluwi aha mari ndrasahan lau tan amwenen. Ya eme ma, jo aso-ok tama taha Kindrei ma hawe Laban Jises Krais, katehei tikisiy ma mondrei tan kudu taha.

⁸Ma mwena handru jo edeu wurah i ta Kindrei tek i san ta Jises Krais ewek taha mari, tasah lau mari badu kon munyak asehek anya, aha badeh, ndratehei budon taha handru ndra-en ta Jises Krais.

⁹Aha ndranyolom ai, sahou mene jo asehek i taha badeh, handru, ya Kindrei badeh, tanan. Kindrei le doh badeh, jo atehei ndrinek mari i tan, ma atudun iy, ma jo edek ta atiye sahou mwasin ta nyala nadun. Ma Kindrei tanan, jo badeh, balek bamani aha bwe na len mari

¹⁰udu bolo salom tek. Jo badeh, ndremenya Kindrei udu bolo salom ta iy kasihi san, ya jo kewek kanyolom aha.

¹¹Jo badeh, aseken labai ta anyolom aha, ma kasehek sahou ta nyosowa Malawin Ndrabun kewek taha, ma kamekes ndrine aha kabadok.

¹²Ya eme jo asehek ta aliy ewek taha, ma eme tek ta aseben taha mari i le rasan. Ya aha kameh anyolom budon tek handru, idah kameh, amekes aha abadok, ma jo ale kameh anyolom budon handru taha ma amekes jo kabadok i le buku aliy.

¹³Ya eme aha nadu tine, bale aha samani lakou doh: San solo-an solo-an jo lomondra ta anya kewek kanyolom aha, arile lakou badeh, mesekei ta jo sawek, eme eme taku dah. Jo badeh, anya kamekes lahou kudu bolo aha, ma kaseben aha kabadok ta budon handru taha ki ta Jises Krais, ma ka-en hamon ta san tan. I buku none jo mene amekes i tiri lau badu leheleh.

¹⁴Jo anya kedeu saluwe lahou tiri lau mari, ki tiri lau badu Grik ma Grik bwe, ma hawe ki tiri lau ta tanan, ma ki tiri lau tana iri lakou bwe.

¹⁵Ya eme ta katin le doh, jo aseken labai ta atiye sahou mwasin ta nyala Krais ki taha lau mari manyah ado Rom badeh.

¹⁶Jo banoh ma bwilik bama ta sahou mwasin ta Krais bwe, tasah idoh badeh, boto-on ta Kindrei ta akohok are lau iri atehei budon tiri handru i ta sahou mwasin doh ame hamon. Sahou doh ma mwena i tiri Juwis, ano badeh, i tiri lau badu leheleh ale.

¹⁷Sahou doh handru, tasah sahou mwasin leheyani kandriyen mwasin ta Kindrei eme lewan, ta iy aloh iri lau mwasin mara-ei ta madan i san ta budon handru le, udu ndra bada katin eme taku na len dah. I buku none tarou ta Kindrei tiye i buku doh, “Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.”

¹⁸Tasah, taha tanan Kindrei udu kandrah, iy leheyani losen tan eme lewan eme andri ili la-u iri lau ta tebelese, ma ta kandriyen ndra-in iri amekes. Ya eme na kandriyen tiri le doh, iri anya katisih sahou handru, ma sokei iri lau winiyan bala tanan Kindrei bwe.

¹⁹Handru, losen ta Kindrei eme andri ili la-u iri, tasah iri kandriyen ma tanan mwasin ta Kindrei badeh, iri winiyan atanan ta aliy, tasah Kindrei ndraleheyaniy ndraleu ndrala mada iri.

²⁰Ya eme kabatana Kindrei mesekei munyak eme taku dah, iri lau anyolom iri lakou iy ndramesekei. Na iri lakou le doh, iri lau winiyan atanan kandriyen rayah ta Kindrei. Handru, iri kandriyen doh amai ta mada iri, arile iri winiyan atanan ta iy badeh, udu kede-eh handru, ma boto-on tan ta udu le buku doh. Eme ma, ta katin doh, iy mesekei iri lau winiyan bawasai anya iri tanan iy bwe.

²¹Iri tanan Kindrei badeh, udu kede-eh, arile iri batudun ma bamasiye iy bwe, ma badeu wurah bala tan ta lakou mwasin iy amekes i tiri, bwe. Ya eme budon tiri badeh inyon; bolo iri mara-ei idih na lulik, ma iri bala tanan ndra-in ma mwasin udu heh bwe.

²²Eme iri anya iri lau ta budon, arile bwe, iri a lolo-ou le gwek.

²³Kindrei badeh, lomadan tinan labai ma iy badeh, winiyan bamak bwe, iy ta udu le buku doh. Arile, iri batudun iy ja bwai, iri ja atudun sukumada kei asehek i buku ndramak, ma hawe atudun iri sirih, iri katin haka hawe iri mwak. Iri lakou mara-ei doh kameh amak au.

²⁴Ya eme ta katin doh le, Kindrei ruwani minen iu tiri, ma iri amekes kandriyen ndra-in in hamon ta boto-on ta seken tiri. Eme ma iri amekes karei hawe iri ari, ari, ma bokoro-ei bada iri amwenen.

²⁵Eme iri sokolowa sahou handru ta Kindrei na wasai, iri batudun Kindrei handru ta amekes lakou mari bwai. Iri atudun le lakou Kindrei mene amekes. Arile, iy Kindrei le doh badeh, lau katudun iy. Handru!

²⁶Ya eme ta katin doh badeh, Kindrei ruwani minen iu tiri. Ma eme iri amekes karei hawe iri ari ari. Ma iri badih badeh, amadin iri le amwenen.

²⁷Ya eme i le buku aliy, iri lau mwan ruwani ta akohok udu iri, ya eme iri mwan amekes kandriyen ndra-in ta karei. Iri lau mwan badeh, amekes karei hawe iri ari ari amwenen. Eme Kindrei edeu maha-an i ta budon ma bolo oda iri, tasah iri amekes karei ndra-in labai i buku doh.

²⁸Ma laba tinan labai, iri batawi budon ta Kindrei mene leheya iri ta amekes bwe. Eme Kindrei ruwani iri ado ndrahun ta budon ndra-in tiri, ma kandriyen ndra-in iri samekes badeh, iri amekes ja.