Rom 16:9-20

⁹Amuto ge vei taiale Banas la haro taku soio tetala. Eia vikapopo letatou te la valolo te Kraist, egira me tabaragu uru e Stekis, amuto ge laharoa girua.

¹⁰Amuto ge veiale Pelis tai la haro sesele taku soio tetala. Eia la tahalo sesele te Kraist, etato tomi rovitia la vulovulola. Laharo taia giteu la karakara te Aristobulas.

¹¹Amuto ge veiale Herodion la haro taku soio tetala. Eia la tau Iuda mai eau. Amuto ge laharo taia giteu la karakara te Nasisas, egiteu ale tautaulailo te La Uru.

¹²Amuto ge laharoale Traipina mira me Traiposa, egirua la tavile iluale, egira igogolu vagari tai te La Uru. Amuto ge laharo taiale Pesis, eia la tavile la igogolu tai isale te La Uru, eia e hatavilegu sesele.

¹³Amuto ge veiale Rupas la haro taku soio tetala, eia la tahalo sesele te la igogolu te Kraist. Amuto ge laharoa girua me tilala, eia mai e tila milua sesele.

¹⁴Amuto ge toi la haro sesele taku soio tegiteu aleie: e Asinkritas, e Pligon, e Hermes, e Patrobas, e Hemas, me egiteu e tabarabara gatou tomi ale pou vikapopo legiteu ele.

¹⁵Amuto ge vei taiale Pilologas la haro taku, egite me Iulia, me Nerias, egira me hatavilela, me Olimpas, me egiteu la valalua me hatavivile tomi te Kraist ale oio tegiteu ele.

¹⁶Amuto tomi ge visagege baoli mai la vulovulo gatou ale te Kraist. Egiteu la lotu tomi te Kraist te la gale ale omai, egite veia mutou e Rom la haro sesele.

¹⁷Eau kaka vagari amutou e tabarabaragu veia amuto ge mata rara tegiteu la valalua ale ge vipou marapa amutou veia amuto kamati ge mulimuli tigi la merera te Kraist ale amite tovo le amutou oio vola. Umala amuto ge hagagavi tegiteu ele.

¹⁸Egiteu ale maie, egite kama vauru e Iesus Kraist, egite vauru moli egiteu. La vikararala tegiteu ale malama, eia tutugolo egiteu la valalua me hatavivile ale kama gabutatala tigi.

¹⁹La maututula tomi lolotia veia amutou omai la mautu e Rom tilimuli tatahoti la merera te Kraist, eala eau sagege pepeho le amutou. Eala moli eau karasuku amutou veia amuto ge rovi tataho la gauru ale taritigi, eala moli umala la vulovulo ale kama kokora eia ge oio bakisi tamutou.

²⁰Mai ge mai ele, eia kama ge tabaa, La Tahalo Uru ge pigi e Satan sotalo te la vaha mutou, amuto ge soa kurua. Amuto ge igoa te la vagagarila te La Tahalo Uru ale vimalilo la tia gatou. La gilogo uru te Iesus, La Uru gatou, eia ge pou tamutou.