Rom 16:5-22

⁵Inbe kawete lo ponana kiau pang di tooltool ke Kirisi yo tigaua rumu kidi, ngan lapau. Inbe kawete lo ponana kiau pang Epainetus. Ya in tool kiau moolmool yo lok panga mai san i. Inbe ya in tool tani yo imuku pang di tooltool ke malala mai Esia ye tarungu lono medana pang Kirisi i.

⁶Inbe kawete lo ponana kiau pang Madia yo iyei urata mai san be ilonang ye i.

⁷Inbe kawete lo ponana kiau pang Andaronikus iye Yunias. Yaru ngan di rara kiau, inbe muku ngan aye di amyepe ye rumu dook tiap kidi talnga dikidiki lono. Inbe kataunu ye di aposol ngan yaru ngan edi maimai, inbe di ngan tiyei tooltool ke Kirisi muku, motong la au nga.

⁸Inbe kawete lo ponana kiau pang Ampiliatus. Ya in ek atu yo itara lono medana pang Tool Mai i, le au i lok panga mai san.

⁹Inbe kawete lo ponana kiau pang Ubanus, yo taye tayei urata pang Kirisi i, inbe pang ek Satakis yo lok panga mai san i, in lapau.

¹⁰Inbe kawete lo ponana kiau pang Apeles, ya in ye Tool Mai matana ngan ikodo le imede moolmool. Inbe kawete lo ponana kiau pang di tooltool yo tiye Aristobulus tiyepe, ngan lapau.

¹¹Inbe kawete lo ponana kiau pang Erodion. Ya in rara kiau. Inbe kawete lo ponana kiau pang di tooltool yo titara lodi medana pang Kirisi a tiye Nasisus tiyepe nga, ngan lapau.

¹²Inbe kawete lo ponana kiau pang di garup ru yo Tiripina iye Tiriposa nga. Yaru ngan tiyei kaiye urata ke Tool Mai san. Inbe kawete lo ponana kiau pang garup san yo Pesis i. Ya in tool kiau moolmool yo lok panga mai san i, inbe ya lapau iyei kaiye urata ke Tool Mai san.

¹³Inbe kawete lo ponana kiau pang Rupus yo iyei urata ke Tool Mai dook mata san i, inbe pang tinana lapau. Ya in ilonau dawa ben au tinak la be ilonau i.

¹⁴Inbe kawete lo ponana kiau pang Asinkiritus iye Pelegon, inbe Emes iye Patrobas ye Emas, inbe pang di diedi yo titara lodi medana pang Kirisi a tiye di tiyepe, ngan lapau.

¹⁵Inbe kawete lo ponana kiau pang Pilologus iye Yulia, inbe Nereus iye lini garup, inbe pang Olimpas, inbe pang di tooltool ke Maro le imot yo tiye di tiyepe nga lapau.

¹⁶Inbe lomim ponana ye di diemim atu atu a kawarara di, inbe katoo momo kiidi a kasom pangadi ye dada dook mata yo ke Maro i. Di tooltool yo tigaua ye bareme ke Kirisi ngan le imot nga, ngan tiwete lo ponana kidi pang lapau.

¹⁷Ang di diek nga, au i lok be awete le kook mede ye betanga pang nen, kin kakamatang dook leu ye di tooltool yo tikapye be tiyei ang a kayepe ki ki nga. Ngan di tooltool yo nen nga, ngan ole tigarungang le kamol ye lomim medana yo kataru i, inbe tipatomonai ang ye betanga matana matana yo ke be ipalelang ye betanga moolmool yo di tooltool ke Maro tipatomonai ang ye muku i. Le lok be kayepe manga mooloo ye di tooltool yo nen nga.

¹⁸Ngan awete pang nen, yesoo di tooltool yo nen nga, ngan tiyei urata ke Tool Mai kiidi Yesu Kirisi tiap, bong di tapdi titoo lodi a tiyei soo dada yo lodi panga mai mata be tiyei nga, ngan leu. Ngan nen le tiwete ngan ole koodi paweserai betanga kidi, inbe tiyei le gorengana ke be tiyolo di tooltool yo taukadi lo galanga nga be titoo di.

¹⁹Ngan ang ngan tikaua bingi kiang a ingaua ni mai i le imot ye yo katoo betanga ke Kirisi nga. Ngan nen le au i lok ponana le lok ponana mai san ye bingi kiang tani. Bong au i lok be ole lomim galanga dook ye so yo dook mata nga a nen ngan kayei, inbe kayepe manga mooloo ye so yo dook tiap nga.

²⁰Maro yo iyei ang le kagauagaua lomim dook mata a kayepe ye lo silene ki i, in ole ilonang a igarungu urata ke Satan palbe leu le du kakodo too ye kemim. Nen le apatarau pang Tool Mai kiidi Yesu Kirisi be ole lono pang a iyei dada dook mata pang le ikenen leu.

²¹Ngan Timoti, au ek atu yo amru amyei urata ke Tool Mai i, in iyawara lo ponana ki pang. Inbe di rara kiau tol yo Lusius iye Yeson inbe Sosipata nga, ngan tiyawar lo ponana kidi pang lapau.

²²Au Tetius, yo akap betanga ke Paulu inbe awodo ilo ye rau tani i, in ayawara lo ponana kiau pang ang di diek yo katara lomim medana pang Tool Mai nga.