ROM 16:1-14

¹Kale numi unang Fibi ko no ti-suu boyo abiip Senkria kutam umi God imi unang tinum imi dong daga-emin unang kale, ibo telele-bom-nilipta o ageta kale,

²nimi aget fugunin uyo, ibo Bisel God imi aget uyo fugun-bomta Fibi uyo kwep meng daalip Kristen ipmi iibak tem kal nan-temu bota God imi unang tinum numi kuguup uyo kulbu kale, unang boyo unang tinum kwiin tagang iyo dong daga-e-bom-nulu e minte, nagal mungkup dong dagane-bom no kem tebesu kale, kanube ogok kwiin tagang uyo bong fagamu min, aget afek kup fugunu min uyo, ipkil mungkup dong daga-e-bom no ke-bom-nilipta o ageta ko.

³Kale nimi weng umobeli boyo kwep no-nilip Prisila so minte imak Akwila so agam iyo kobelin o ageta kale, agam bilip iyo Yesus Krais imi ogok uyo niso mangkal maagup ogok kemin kale,

⁴agam bilip iyo, waasi iyo tebe agam nuyo anolip kaan-numup bole, kanube kaan-numup o age-nilipta, dong dogopnelipta, waalan-sii kale, boyo nita kup agam bilip iyo, “Misam o,” agan-biisaali kale, alugum tinum miit maak maak imi Kristen igil agam bilip iyo, “Misam o,” agan-bom no ke-bii-silip kale,

⁵ibo nimi weng umobeli boyo Kristen unang tinum iyo tal agam imi am kutam umi tala tala ke-bom beten ke-bomip bilip imi kobelin o ageta ko. Kale minte ibo fen nalami duup Epainetus iyo nimi weng umobeli boyo kwep no kobelin o ageta kale, beyo alugum Provins Esia boyo ki kamaki uyo besiik mitam Krais imi ilak uyo dosa ko.

⁶Kale minte nimi weng maak kobeli uyo ibo kwep no ipmi dital faga-bom dong daga-emin unang Maria umi kobe-nilip e minte,

⁷maak uyo kwep no Andronikus so minte Junias so alop bilip imi kobe no kelin o ageta kale, alop bilip iyo niso ninggil maagup Juda kasel kale, God imi kalaan tinum iyo tebe alop bilip iyo win tambal kup kupka-e-bomip kale, niso ninggil sok de imolip bii-sulup kale, bilip isiik Krais imi ilak uyo dolipta, nita aaltam Krais imi ilak uyo dosi ko.

⁸Kale minte aa nimi duup maak Ampliatus beyo Kamogim imi ilak dolin kale, imi weng umobeli uyo kobe-nilip e minte,

⁹Ebanus beyo iso nuso Krais imi ogok kemin kale, imi weng umobeli uyo kobe-nilip e minte, fen nalami duup Stakis yagal weng umobe no keli kale,

¹⁰kobe-nilip e minte, maak uyo kuguup mafak uyo tebe Apeles bemi diim aban-bo kuta, beyo titil fagaa fen Krais imi kuguup waafulin tinum kale, imi weng umobeli uyo kobe-nilip e minte, Aristobulus ulimal imi weng umobeli uyo kobe no kelin o ageta ko.

¹¹Kale maak uyo, Herodion beyo niso alop maagup Juda kasel kale, imi weng umobeli uyo kobe-nilip e minte, Kristen unang tinum Nasisus imi am kutam maagup nin imi weng umobeli uyo kobe no kelin o ageta ko.

¹²Kale minte maak uyo, nimi weng umka-emin uyo kwep no Kamogim Yesus imi ogok dital fagaa ogok kemin unang Trifina so Trifosa so bilip imi kobe-nilip e, mungkup nimi weng umka-emin maak uyo kwep no Kamogim imi ogok dital fagaa ogok kemin tinum fen nalami duup Pesis beyo kobe no ke-nilip e minte,

¹³mungkup nimi weng umka-emin maak uyo kwep no Kamogim imi fomtuup daang baga-emin tinum Rufus iyo kobe-nilip e, mungkup ilami ogen ulumi man tiin mobu ulutap ke niyo tiin mo-bomu bomi kobe no ke-nilip e minte,

¹⁴maak umi kwep unon-temip uta kwep no Asinkritus so Flegon so Hemes so Patrobas so minte Hemas so minte duubal iso albip so imi kobe no ke-nilip e minte,