Rom 15:8-23

⁸Wataget iragen God omayan baewa wa agiat mumeni menan nop mega tavewa ewamopen menan Keriso watu enen Diu nagirewa ta warit mumen.

⁹Ap tani gapan God ta warit mega Diu uoni nagirewa inamup taueni menan ian ugupe nagirewa den God munan bagu sisi anuni menan God wa atonasiwanum. Nop mega ok anega sean, Ne Diu apanewa da, ian ugupe nagire nimakamup, wa atonat gimagivin. Yauga ao warapen menan wak waivin.

¹⁰Sia God nop mega ok anega seane, E Diu uoni nagirewa, God waenapan mega den, God inap aton di anun.

¹¹Sia anega seane, Ian ugupe nagirewa iragi Ayop nuga God wa atonasen. Waenapan iragi God wa atonasen. Ok anega sean.

¹²Amba apan Aisaya den anega sen, Devit mamewa Diesi naewa da taueta. Tauepi ian ugupe nagirewa ayop muga tata. Mu ayop muga ame inap anu dave, tumap wanumoin.

¹³God nuga anu dao mega gapan e imuya potaya aton ge nonup no dotouep amba anu tumat ega gamup, Guewa Woup Seni aroewa gapan, anu dao ega kai warep waniwanian.

¹⁴Evenan wainawa, ne enan manega anuivin. Guegue kakaevet taiwanian dim dim iravi anu kakayat wanian gare gare wawa isiwanian.

¹⁵Go ok nega ma gapan nop ugup ugup e sia anu awapen menan. Ne epara ta sean iwa God nenan anuni menan nao mame nenen.

¹⁶Nao nega ame Iesu Keriso menan Diu uoni nagirewa wat agoat imaivin. God Nop Oit Mega Kakaewa Diu uoni nagirewa wadiamopena gapan mu imumu potamu yan ta Guewa Woup Seni aroewa gapan pirisi apanewa mini ne God inap wanapen taivin.

¹⁷Ne Iesu Keriso den intum tana menan ne dim da God wadianegeni gapan gapan taingina ame God yamap umap di anuivin.

¹⁸Nek tana oisewa ya wain go Keriso aro neneni gapan taingina epara tap oisewa ame aroga wadiamoin. Ame Diu uon ian ugupe nagirewa God nop mega anu warapen menan wan taingin.

¹⁹Nop mega anu tapen menan yo paua kimaniwa ugup ugup taingina amba God Guewa Woup Seniwa amunewa gapan wadidiamuingin. Ap menan ne pa Ierusalem gapan namu at at iragi Keriso Oit Mega Kakaewa iravi wadidiamuin ena amba at nonongawa Ilirikum den tauan wadiamon.

²⁰Ne men anuna mam. Keriso Oit Mega Kakaewa, at at ugup ugup God No Oise Kakaewa ya anune nagirewa inamup ange wadidiamot anun. At upi Iesu oisewa namu anune arewa ya angain iwa ibarip aigap sia wadiamopena tawa.

²¹God nop mega ok anega seane, God oit mega ya anune nagire anuin. Ya anune nagire anupi gapan anu awain.

²²Inayap wam aruga daio onget anuna go at ugup ugup wadidiamuingina gapan wam wakauman.

²³Go endi nao nega at at ame gapan uon tan. En aruga yawaet anuingina menan endi inayap onget anuivin. At Sipein angepena yaumakape pa sewa Rom nagire den yawaet anuivin. Wam otu da inayap atonu den daio waineta amba watu enanegene serarat ange at Sipein tauap.