Rom 15:7-31

⁷Amboac tonaŋ akôc taôm sa êtôm Kilisi tau kêkôc amac sa, gebe aŋgôm Anôtônê ŋawasi êsa.

⁸Aê jasôm ŋoc biŋ tonec gebe Kilisi gêmêŋ kêtu lau Juda nêŋ sakiŋwaga gebe êwaka Anôtô sa, gebe eŋ ŋac biŋŋanôŋa ma êŋgôm biŋ, taŋ Anôtô gêjac mata gêdêŋ êsêac abeŋi naŋ, êtu anô.

⁹Ma eŋ gêmêŋ kêtu sakiŋwaga gebe lau samuc tetoc Anôtô sa êtu taê walô êsêacŋa. Kêtôm teto gêc gebe “Amboac tonaŋ aê aoc êôc aôm jamoa lau samuc ŋalêlôm, ma jaŋga wê êpi nêm ŋaê.”

¹⁰Ma kêsôm biŋ teŋ gêwiŋ gebe “Amac lau samuc têmtac ŋajam êsa awiŋ ênê lau.”

¹¹Ma biŋ teŋ gêc gebe “Amac lau samuc samob alambiŋ Apômtau, ma tenteŋlatu samob sêlanem eŋ.”

¹²Ma Jesaia kêsôm nê biŋ tonec gebe “Isainê ŋawakac oc êlêc sa, ma ŋac, taŋ mêŋêsa naŋ, oc ênam gôliŋ lau samuc, ma lau samuc oc sêkêŋ mateŋ eŋ.”

¹³Anôtô taŋ kêtu aêac takêŋ mateŋ ŋamôkê naŋ, êkêŋ amac akêŋ êwiŋ ŋajaŋa e têmtac ŋajam to biŋmalô ênam amac auc samucgeŋ, gebe Ŋalau Dabuŋ êpuc amac tôŋ ma akêŋ matem anac ŋawaegeŋ.

¹⁴O ŋoc lasitêwaac, aê kajaJa kêtu tôŋ gebe gabêjam gêjam nêm ŋalêlôm auc ma ajala gêŋ samob tomalageŋ ma atôm gebe alêŋ biŋ taôm ŋaŋêŋgeŋ.

¹⁵Mago kato biŋ tonaŋ ŋalô ŋagêdô ec ŋajaŋa gêdêŋ amac, gebe japuc nêm ŋalêlôm tôŋ taêm ênam biŋ tau êtiam. Aê kato ŋalô tau gebe Anôtô kêkêŋ moasiŋ gêdêŋ aê,

¹⁶ma kêkêŋ aê katu Kilisi Jesu nê sakiŋwaga gebe janam kôm êpi lau samuc amboac dabuŋwaga teŋ, taŋ gêjam Anôtônê ŋawae ŋajam ŋasakiŋ dabuŋ gebe Ŋalau Dabuŋ êkalem lau samuc têtu Anôtônê gêŋ e têtu da dabuŋ ênac Anôtô mataanô ŋajamŋa.

¹⁷Kilisi Jesu gêbiŋ aê tôŋ, tec ôlic kêpi kêtu kômŋa gebe gajam kêtu Anôtôŋa.

¹⁸Aê katêc tauc, tec jasôm biŋ teŋ atom, biŋ tageŋ, taŋ Kilisi kêkêŋ gebe jaŋgôm e lau samuc taŋeŋ wamu Anôtô naŋ. Aê gajam kôm tau ŋa biŋ to lêŋ.

¹⁹Kilisi kêkêŋ ŋaclai gêdêŋ aê, tec gagôm gêŋtalô to gêŋsêga, ma Ŋalau Dabuŋ kêkêŋ ŋaclai gêdêŋ aê amboac tonaŋ, tec gajam mêtê Kilisinê ŋawae ŋajam tomalageŋ gajac m aŋga Jerusalem ma gajam e gaô lasê lluriki.

²⁰Aê têtac gêwiŋ gebe jasôm ŋawae ŋajam lasê êndêŋ lau taŋeŋsuŋ samuc Kilisinê ŋaêŋa. Aê gabe jau ŋoc demboŋ ênsac lau teŋ nêŋ alê mata atom.

²¹Kêtôm teto gêc gebe “Lau taŋ sêŋô eŋ ŋawae atom naŋ, oc sêlic eŋ, ma lau taŋeŋsuŋ samuc naŋ, oc sêjala eŋ.”

²²Kôm tonaŋ kêkô aê auc ŋapaŋ, tec gadêŋ amac gêwac atom.

²³Kêtôm jalageŋ gajam aoc su gabe jandêŋ amac jawac, ma galoc gajac dabiŋ ŋoc kôm aŋga gamêŋ tonec sugac.

²⁴Amboac tonaŋ taêc kêka gebe jalic amac êndêŋ wacjasa amacnêm gamêŋ êndêŋ taŋ gabe jana Spania naŋ. Aê jatu samuc amac ŋasawa dambê su acgom, go jakêŋ matoc gebe akêŋ aê jana gamêŋ ônê.

²⁵Galoc tonecgeŋ aê kasêlêŋ kapeŋ Jerusalem gebe najanam sakiŋ Anôtônê lau aŋga tônê.

²⁶Gôlôac dabuŋ Makedonia to Akaiaŋa sêmasaŋ kêtu tôŋ gebe sêkêŋ da ênam Anôtônê lau aŋga Jerusalem nêŋ lau ŋalêlôm sawa sa.

²⁷Êsêac tauŋ sêmasaŋ kêtu tôŋ ma sêgôm jagêdêŋ gebe lau Jerusalemŋa nêŋ tôp gêc êsêacŋa, gebe lau samuc sêwê kaiŋ lau Jerusalemŋa nêŋ moasiŋ ŋalêlômŋa, tec gêjac lau samuc ŋawae gebe sênam lau Jerusalem ŋa sa ŋa moasiŋ oliŋŋa.

²⁸Aê jakêŋ ŋanô, taŋ êsêac sejoŋ sa naŋ, êsêp lau Jerusalemŋa lemeŋ to janac dabiŋ kôm tau su acgom, go jandi jasa nêm gamêŋŋageŋ jana Spania.

²⁹Aê kajalagac, embe jandêŋ amac jawac, oc jawac to Kilisinê mec tolêlôm-tolêlôm.

³⁰O lasitêwaac, aê jateŋ amac êtu aêacnêŋ Apômtau Jesu Kilisi to êtu Ŋalau Dabuŋ nê têtac gêwiŋ aêacŋa, gebe anac siŋ awiŋ aê ma ateŋ mec êndêŋ Anôtô êtu aêŋa.

³¹Ateŋ gebe ênam aê kêsi êndêŋ lau sêkêŋ-gêwiŋatomwaga, taŋ semoa Judaia naŋ, to Anôtônê lau sêlic ŋoc sakiŋ, taŋ janam aŋga Jerusalem naŋ, ênac mateŋanô ŋajam.