Rom 14:10-20

¹⁰Iwe, pwota en ka apwüngü pwiüm we? Nge pwal en, pwota ka esita pwiüm we? Kich meinisin sipwe ütä mwen mesen Kot pwe sipwe kapwüng me ren.

¹¹Pun a mak lon ekewe Toropwe mi Pin, “Ewe Samol a apasa: Üa akapelüei, pwe aramas meinisin repwe fotopwäsuk mwen mesei, nge aramas meinisin repwe pwärätä pwe ngang Kot.”

¹²Iei mine kich meinisin sipwe en me püsin pwärätä föförün lon manauan ngeni Kot.

¹³Iei mine sipwe ükütiu le apwüngüfengenikich eman ngeni eman. Nge iei mine oupwe ekiekietä lon letipemi, pwe ousap föri och met pwimi epwe chepetek ren ika turutiu lon tipis.

¹⁴Pokiten ai nonom lon ach Samol Jesus üa wesewesen lükü pwe esap wor och mongö mi pin ngeniei. Nge are eman aramas a lükü pwe ekoch mongö ra pin ngeni, mürin ewe mongö a pin ngeni.

¹⁵Are pwiüm a weires reöm pokiten ka mongö och sokun mongö, ka föri och föför esap chüen fis fän tong. Kosap mwütätä pwe om mongö och sokun mongö epwe afeiengaua ewe aramas Kraist a mäla fänäsengesin.

¹⁶Kosap föri och met aramas repwe esita mine en ka ekieki pwe a mürina.

¹⁷Pun Mwün Kot esap longolong won anach me ünümach, nge a longolong won pwüng, kinamwe me pwapwa mi feito seni ewe Ngünmifel.

¹⁸Iwe, eman me eman mi angang ngeni Kraist lon ei sokun lapalap a apwapwai Kot o aramas repwe pwal tipeeu ngeni.

¹⁹Iei mine sipwe fokun achocho ngeni mine epwe afisätä kinamwe o alilisfengen le apöchökülafengenikich lefilach.

²⁰Ousap atala än Kot we angang pokiten mongö. Ekewe mongö meinisin oua tongeni mongö, nge esap pwüng än eman epwe mongö och mine epwe afisätä än eman epwe turutiu lon tipis ren.