Rom 11:29-35

²⁹Got oh Norhor ama ihirnong imat yah da aprisa amburipramur rihanoh ama giri meng danong oh na yawar deipat han ohoh ihan na yawar mara ihirnong bopor mat papatmur.

³⁰Gur rih ma pateshe oh Got ohe mengnong sakarap mar amkar er hat sashemur. Ama ihat er hat sapti gurnong Juda hat pati han ihir Got ohe mengnong sakarap mar amkar ihat sapti ohe pe oh Got oh Juda na hat pati bap gurnong hinhina naham yah da napripatmur.

³¹Gin ire ma imat sakarap mar pisapti pe oh Got oh gurnong ma hinhina naham yah da napripatru mat orhor ihirnonghe imat orhor sa aprisipra.

³²Got oh Norhe hinhina da oh Juda hat pati hansi; Juda na hat pati hansi gonsi gon ihirnong apinmat oh norhe mengnong sakarap mar namkar sapti ohe hrepnong mat paptepora daham ama sakarap meng ohe hrepnong mat papatmur.

³³Got orhe dakuu hat patim ma ihpat dao orhe am hat pat dao oh isip isipnap hat patmur. Orhe imtipora daham ma indeipat da oh hanip dir duupteinong wamar am hatiproheda. Basra. Na am hatin hatinmur. Orhe ma inahat napapat ohe danong oh dir na am hatin hatinmur.

³⁴Orhe ihat pat ohe meng ma brak matip meng oh mamaru hat patmur. Hanipyah orhe ihat dahapat ohe da oh hanip dir nih am hat pat. Dir na am hat patinapmur. Ihat dahat pat han orhornong nih Got go ihat dahat indinmura; ihat dahatinmur potiproh. Dir timbasnapmur.

³⁵De han oh ohnong tit han tit apriporhan ohdapat it dirnong yansi nahatiproh. Basra. Dirdapat tit han tit ohnong yan mar apin oh timbasnapmur. rim brak matipmur.