Rom 11:14-34

¹⁴Una nung a pinapam ri, a nemi sur an ukatutur a nuknukin anung a kabotaro, sur lako taro tagun det, det in nemnem sur a wakakino ra o God i pam tari un mot, ra in ulaun pas det.

¹⁵O God i rosumur munung gusun a taro Israel, sur in marom nama taro gisen tagun a rakrakon bual. Ra o God in ben melet pas a taro Israel, in wakak sakit, in elar nami ra det sa katutur melet gusun a minat.

¹⁶An wasiso elelar lenri: Ra a mugano du beret di pitari torom o God, elar nama ngasino anun a taro Israel, in kudulano beret rop anun o God. Ra a wakakor nin nanai di pitari torom o God, a kum kanokano kai anun o God ut.

¹⁷A taro Israel det elar namin nanai na oliw mulus, ma mot a taro gisen mot elar namin lomlom nin nanai na oliw. O God i pak ru a ramano kum kano gusun in nanai na oliw mulus. I los pas a ramano kum kano lomlom na oliw, ma i pam a bading tomo namin nanai na oliw mulus. Ra uniri, mot laun tagun a polo ra i wan gusun a wakakor nin nanai na oliw mulus.

¹⁸Gong mot tama pisopiso a kum kano ra di sa pak ru det. Ra mot tama pisopiso det, mot in nuk pasi lena, in wakakor nin nanai ut i pitar a nilaun torom mot a kum kano, awu sur a nilaun i wan tagun mot.

¹⁹Kutiro mot in watungi lena, “O God i pak ru a ramano kum kano sur in kubus tar iau una nubual ra di sa pak ru det gusuni.”

²⁰A lingmulus ut, o God i pak ru det uni ka det nurnur. Ikut mot, mot tur dekdek uni mot nurnur. Gong mot ulabo pas mot, mot in ngara.

²¹Uni o God ke maris bat a kum kano tagun in nanai na oliw mulus. Ra i pami lenra torom det, in pami kai lenra torom mot ra ka mot nurnur.

²²I mo ra mot in tama a marmaris ma a kankan anun o God. I ese anun a kankan torom det ra det wan gisen gusuni, ma i ese anun a marmaris torom mot, ra mot tur dekdek una nun a marmaris, ma ka mot mana gusuni. Ikut, ra awu, in pak ru mot kai.

²³Ma a taro Israel kai, ra det in nurnur det kai din kubus tomo melet det namin nanai na oliw mulus, uni i topas o God sur in kubus tomo melet det.

²⁴O God i pak pas mot gusun in lomlom nin nanai na oliw, ma i kubus tomo tar mot namin nanai na oliw mulus, ra awu sur tagun mot. Ra i pami lenra, ke ngangitin sur in kubus tomo melet a kum kano tagun in nanai na oliw mulus namin nanai ino.

²⁵A kum tistising, a nemi sur mot in mananos una utna ra numugu i kis eno, sur gong mot ulabo pas mot. I lenri: Ara taro Israel, in dekdek a balandet, tuk ra a niluluk ina taro gisen ra det nurnur in elar nama nuknukin o God.

²⁶Una kisapi ri, o God in ulaun rop pas a taro Israel. Elar nami ra di sa tumus tari una Buk Tabu lenri, “A Tene Ulaun in nanpat tagisapat o Saion, ma in ben pukus a kabotaro anun o Jekop gusun anundet a petutna na rosumur gusun o God.

²⁷Ra iri a kunubus ra an pami tomo nam det, an lakro ru anundet a kum sakino petutna.”

²⁸A taro Israel det a kum ebar anun o God, uni ka det nurnur una Wakak na Wasiso, sur in udan mot a taro gisen. Ikut, o God i maris doko det, uni i pilok pas a kum tumtubun det tagun numugu.

²⁹Uni o God ke ser los pukus anun a kum etabor ma ke ser pukus a nuknukino gusun a taro ra i sa kabo pas det. Awu!

³⁰Numugu, mot a taro ra awu sur a taro Israel, mot ser pitarngat torom o God. Ikut uniri, mot sa rakon anun a marmaris, uni a taro Israel det pitarngat toromi.

³¹I lenkutkai ra, uniri a taro Israel det pitarngat torom o God, sur det in rakon anun a marmaris, uni i maris mot.

³²Uni o God i madek tar a taro rop sur anundet a pitarngat in ker det, sur in ese anun a marmaris torom det rop.

³³Nandet! I labo sakit a kum wakak na ululeng anun o God, anun a wakak na nuknuk ma anun a mananos. A warkurai anun o God i labo sakit, kataio in palos lar pasi. Katutaio i tasman anun a kum kisapi.

³⁴“Osi i tasman a nuknukin o God? Ma osi i wasiso waruti?”