Rom 11:12-27

¹²Suw senkin, Israel mo kamaun sow yor ko kueir nonaw hokwe, God hiykwe hyo maym ihey-ar mokwe uwrsa poya-poya mo owh mon po mon ousne. Seyr Israel hom meiaw mon ma lour anyan nok ko kueir nonaw hokwe, God hiykwe sawk uwrkayn irweyk me seme maka-sahre huonok hiymon ihey. Israel hom ma makuayk hokwe, uwrsa ki serey serey suko me hiymon, hom God so owh mon ley e. Hakwe sawk senkin sehe nan, Israel lowpwarowp hom God so owh mon ma-le swa-hokruw konpakon ankin, yor sokukwe God so maym kow yor ihey-ar ke mon ousne ey, paraw hrom ma lira lopa senkin.

¹³Ok, ha ma kiy-me okukwe, hakwe hme uwrkayn irweyk me kiy-me. Aposel-mey, ha uwrkayn irweyk mo ompok mon ma kiy-meio ohokwe, hakwe ipey-ar nuw-nan.

¹⁴Hakwe aposel-mey sokukwe senkin sehe meio, hano uwrku Israel homkwe, God hiy uwrkayn irweyk me ma hiymon me ka lira way ompeys-ma-peys. Seyr Israel har-har-aw me God hiy yerki sohiy so kueir ka me-huonok prosue.

¹⁵Payhokuaw, God hiy Israel me ma lour swaweyr yay ha hokwe, hiykwe mey yaprue kamon, senkin ma-sahre mon ousne. Mey yaprue sokukwe senkin: Hiykwe uwrsa lowpwarowp hyo awia-pow ma lwak mokwe, yerki hom hyo wayh ihey-ar lwak ey ke po kampi kow. God hiy Israel me ma lour swaweyr yay ha so ayay mokwe, yaprue senkin me leip ankin, hai, God hiy Israel poya-poya me ma-huonokyaw yawriy ankin, mey sohok ko ayay mokwe penkin me leip ey so? God hiy hme ma ma-me-huonok yawriy sohokwe, lokrue uwrsa me su ma me-sian wayr me hieyn.

¹⁶Homkwe nonkway, hunkwe ihey mo naw-kopi peyrmawk ko ke God se kow pie ankin, ihey mo naw kopi sokukwe pekney-weys lwak. Seyr ihey mo naw kopi sokukwe sawk hno ihey mo naw lowpwarowp me pekney-weys mon ousne liyay. Seyr now kamon so meyk hokwe pekney-weys lwak ankin, kueim lowpwarowp mokwe seyr pekney-weys lwak.

¹⁷Israel homkwe oliv-now wueir-ar mon ma saro se hieyn. Sawk oliv-now sohiy so kueim har mokwe papo nekie kama-pwa kuayk sakuayk. Sawk uwrkayn irweyk hunkwe, oliv-now sapa ko so kueim ke hieyn. Hnekwe ka-nekie kaun nok ok, oliv-now-ar so kueim mo yop-yop mon nak-saronay osi hor kraipakrai. Hunkwe sawk oliv-now-ar sohiy so nioh se non-owswa-liy kowp-kowp ie.

¹⁸Sawk hunkwe senkin peie nak-me-heyr o, “Hakwe oliv-kueim wueir ko mo eir mon lwak.” Sawk hunkwe nak-me-heyr e nan ankin, hunkwe peyr ok okwe kwa nanpanan. Hunkwe oliv-now sohiy so meyk se hiymon owk naw-a-naw ie pey, sawk oliv-now sohiy so meyk hokwe hne hiy-mon owk naw-a-naw ie.

¹⁹Sawk hmo prueyn hiy senkin nak-me-heyr lak, “Oliv-now-ar so kueim mokwe seme lon kama-pwa, hane hmo yop-yop mon nak-saronay osi hor meio way kraipakrai e.”

²⁰Mo okar. Sawk Israel me kokwe seme nekie kama-pwa sow, payhokuaw, homkwe Hakamay se nan kiykiy-ay pa. Sa hunkwe sehe lorok kraiay, payhokuaw, hunkwe nan kiykiy-ay. Hwon senkin ma lorok se, hno uru arian se peie nak-owk nakie o, sawk hunkwe kwa nak-hok.

²¹Payhokuaw, hunkwe kwa nanpanan, God hiykwe oliv-now-ar so kueim mokwe ma-isay wak lopa lwak ankin, hne seyn, hiykwe liy ma-isay wak ley.

²²Hunkwe God so nan ihey yor o, hyo me-hripahri-ok o, seme kwa nanpanan. God so me-hripahri-ok kokwe uwrsa ma makuayk sakuayk me po mesair kow. Sawk hunkwe hyo nan ihey yor ke-aw nakruok ankin, hiykwe hnekwe hyo nan ihey yor kokwe senkinaw-aw mesair kow ey. Sa hunkwe God so nan ihey yor ke lokriy hain ankin, hnekwe nekie kampwa lway swasow.

²³Sawk Israel homkwe hmo kamaun sow yor seme preisia hain ankin, hmekwe hmo yop arian, hom paraw ma lwak mon, ma-nak-saronay osi hor meio way kraipakrai ey. Payhokuaw, mey senkin mokwe God hiykwe liy mon ousne.

²⁴Suw senkin, hunkwe kueim oliv-now sapa ko me ma nekie pwa-say me hieyn. Sawk mo hwon oliv-now sapa ko so kueim ke hieyn lwak liok, hne kokwe oliv-now-ar mon po nak-saronay osi hor meio way kraipakrai. Sawk omok kokwe God hiykwe Israel mo kueim, paraw ma nekie pwa-say seme manak-saronay osi hor meio way kraipakrai ankin, sohokwe hyekwe honon honon liy lwak ley, payhokuaw, homkwe mo oliv-now serey suko arian.

²⁵Hano wayh-om, hakwe senkin nan, homkwe God so ouon-aw-ok kamon ke kwa nuw-nonkway. Sawk homkwe God hiy hme ma me-huonok me hmo uru arian me lowk nakie lak. Ouon-aw-ok sokukwe senkin, Israel mo yor, makwey ku-mein ma lwak mokwe, senkinaw lwak wayr lopa. Sawk God hiykwe Israel me kokwe enekwei uwrkayn irweyk lowpwarowp hom God so owh mon le lowpway non, manuw-me-huonokyaw prosue lowpway ey.

²⁶Sawk yerki sohiy non kokwe, God hiykwe Israel lowpwarowp me maka-me-huonok prosue ey. God so mamey porih hok ma me, senkin, “Omok kokwe uwr prueyn, Israel me kahya huonok prosue ey hiykwe, mnuw Saion ko se le ey. Hiykwe Jekop so ney-nona mo yor God se meyki ma kankoum sow, seme mon-say kow ey.

²⁷Hakwe Israel mo weynpaweyn piap-araw me monsay kow hokwe, hakwe sokior-ok enkin hme nion non-me-sakon kawk ey.”