Románolachi 16:9-20

⁹Junsi Urbánochinan saludo erenayoe. Nu chiquilabe Jesucristo tenchi duque ticatiya quimin jominhe. Junsi Estáquicanan duque laquirato, nuchi saludo erenayoe.

¹⁰Junsi Apélechinan saludo erenayoe. Nu Crístochi tenchi padeseinatonan, natiya peleitunue. Junsi Aristóbulochi familialachinan saludo erenayoe.

¹¹Junsi Herodión israelita pejonan, nuchi saludo erenayoe. Junsi Narcísochi familiala weyanla Miya Jesucrístoca quereiminla joe. Junni nulachinan saludo peerenayoe.

¹²Junsi Trifénachinan, Trifósachinan saludo erenayoe. Nula Miya Jesucrístochi joto, yachi tenchi ticatiya quito penenamin jolajoe. Junsi Pérsidacanan duque laquirato, nuchi saludo peerenayoe. Nunan Miya Jesucrístochi joto yachi tenchi duque ticatiya pequimin joe.

¹³Junsi Rúfochinan saludo erenayoe. Nu Miya Jesucrístochi tsachila tala sen tsachi joe. Nuchi ayanchinan saludo peerenayoe. Labe ya lachi ayan cuwenta jominhe.

¹⁴Junsi Asíncritochinan, Flegóntechinan, Hérmachinan, Patróbachinan, Hérmechinan, yalabe pejunlachinan saludo erenayoe.

¹⁵Junsi Filólogochinan, Júliachinan, Neréochinan, Neréochi soquichinan, Olímpachinan saludo erenayoe. Junsi Olímpalachite Jesube penenamin tsachila junte jerale pelayaiminlachinan saludo erenayoe.

¹⁶Nula tala Diosichi tsachila jolajoto, lachi tenchi mo tito saludaicaalaquina! Jerale Crístochi tsachi bolonla nulachi saludo erelaquinae.

¹⁷Acola, soquila, nula tala weyanla uyan tala micarichi timinla joe. Nulaca man bolon, man bolon suwachi timinla joe. Jutsa quisa carichi timinla joe. Nulaca seque micarica jun fiquicari munaratuminla joe. Junni nulaca payinayoe yalaca meralaquitusa. Molatiya tsanque nenaminlaca quirato, yalabe penenatuto, chican nenanola joe.

¹⁸Tsanque micariminla chiquilachi Miya Jesucrístoca merátuto, yalachi tenca munateri nenaminla joe. Otoque sen fiquinan quiranca pato micarito, tenca itonlacari querecariminla joe.

¹⁹Piyanle tsachila miralarae nulari Diosichi sen fiquica meráminla joeque. Junnan nulachi tenchi son timanyoe. Juntonan ti fe sen jonuncatiya nulaca seque mirasa munarayoe. Seiton quinoca mantimini tenca iton jolajosa munarayoe.

²⁰Diosi pansi chusa carimin joe yape wepanatuto chularasa. Junni nula tsanque seque nenanari, pansi chusa carimin Diosi nulaca moora yucanca feisa carichunae. Junni chiquilachi Miya Jesucristo nulaca laquirato, nulabe sen josa tenjae.