RAWUMBUYŊUWU DHÄRUK 3:4-18

⁴Yäääw, yaka warray. Yolŋuyu warray yurru djawukirrinydja ḻakarama, yurru Gunhu'yunydja yurru yaka warray bitjandhi djawukirri ḻakarama; ŋayinydja bitjan liŋgu yurru yuwalk warray yana, yaka ŋayinydja yurru nhanŋuwaynydja dhäruk-nherraṉminyara gulkmarama. Liŋgu ŋunha Djorra'yunydja yukurra ḻakarama Gunhu'nha bitjan warray gam', “Gunhu', nhe yurru djämana-yana-wala ŋurikiynydja dhärukpuy ŋunhi nhe dhäruk-nherraṉmina; Ga ŋunhi yurru ŋula yol yolŋu ḻarruma nhuŋu djarrpi'wunydja, ŋayinydja yurru nhuna maḻŋ'marama ŋamakurru' warray yana, rom dhunupa warray.”

⁵Wiripunydja ŋuli yolŋu waŋa bitjan, “Ŋunhi ŋarranydja ŋuli djäma yätj, bala ŋarrakalanydja ŋuriŋiyi yätjthu ŋuli ḻakarama yukurra warraŋulkuma Gunhu'nhana, ŋunhi ŋayinydja rom-dhunupa warray yana, ganaŋ'thun warray yukurra yolŋuwala. Yakana ŋunhinydja dhunupa nhanŋu Godku, ŋunhi ŋayi yurru ŋarranha dhä-ḏir'yun ŋurikiy yätjpuy.” Yo, dhäruk yäna dhuwalayinydja ŋarra yukurra waŋa, bitjan ŋuli yolŋu waŋa, yanapi ŋayi Godtja yolŋu yana wal'ŋu.

⁶Ŋunhi bini yaka dhunupa Godku dhä-ḏir'yunarawu yätjmirriwunydja, ŋunhiyinydja bitjan ŋayi yaka mala-yarr'yunaramirri bukmakku yolŋu'-yulŋuwu, yanapi ŋayi yurru yakana ŋula waŋganynha yolŋunha dhä-ḏir'yun, liŋgu bukmak yana dhuwurr-yätjthinanydja.

⁷Yo, ŋunhi bini yolŋuwalanydja ŋuriŋiyi bothinyaraŋuyu ḻakaranharayu ŋuli yukurra warraŋulkuma ḻakarama Gunhu'nhana, ŋunhi ŋayinydja yuwalkkuma warray ŋuli yukurra ḻakarama, ganaŋ'thun warray yukurra yolŋuwalanydja, bala nhäkuna nhuma yukurra ŋarranhanydja yätj-ḻakarama?

⁸Yakana dhuwala ŋamakurru', ŋunhi ŋuli yolŋu waŋa bitjan, “Gul' ŋilimurru djäma yätjnha wal'ŋu, märr yurru yolŋu'-yulŋuyunydja wokthunna yurru ḻatju' ḻakaramana ŋanya Gunhu'nhana.” Yo, dhuwalayinydja malanha djarrpi' warray wal'ŋu dhäruk, yaka dhunupa, yurru wiripu-guḻku'yunydja ŋuli guyaŋirri yätj-ḻakaramana ŋarranhana, yanapi dhuwalayinydja malanha ŋarrakuŋuna ḻakaranhara. Yuwalayinydja malanha ŋarrakuŋuna ḻakaranhara. Yuwalknha yana ŋayi yurru Gunhu'yunydja dhä-ḏir'yun yätjpuy djämawuy yolŋunha.

⁹Yo, Gunhu'yu Godthu wekaŋala nhanŋuway ŋunhi rom ŋanapurruŋgala Djuwskala dharraylili, yurru yakana ŋayi yurru waŋa ŋilimurrunha yätjpuynydja djämawuy bitjandja, “Bäyyi. Yakana ŋarra yurru dhä-ḏir'yun.” Bitjandhinydja ŋayi yurru yakana yana guyaŋirri. Ŋayi yurru Gunhu'yu ŋilimurrunha dhä-ḏir'yundja rrambaŋikumana, Djuwnha yolŋunha ga mulkurunha yolŋunha, liŋgu bukmak yana ŋilimurru dhuwurr-djarrpi'thinanydja.

¹⁰Yo, Djorra'yunydja yukurra ḻakarama yolŋu'-yulŋunha bitjan ŋunha gam': Yakana ŋula waŋgany yolŋu yukurra nhina rom-dhunupa Gunhu'walanydja maŋutjiŋura;

¹¹Yakana ŋula waŋganydhu yukurra dharaŋan dhunupanydja wal'ŋu Godku rom, Ga yakana ŋula waŋgany wirrkinydja wal'ŋu djälthirri yukurra Gunhu'wu yuwalkkumanydja wal'ŋu.

¹²Liŋgu bukmak yana yolŋu walala bilyurrunanydja, ŋapanydja-wekanhamina Gunhu'wunydja; bukmak yana gatjpal'yurrunana yukurrana nhäŋiniŋ'thinana rom. Yakana ŋula waŋganydhu yolŋuyu ŋuli yukurra djäma ŋamakurruny'tja dhuwurr, yakana ŋula waŋgany yana.

¹³Bitjanna liŋgu ŋuli yukurra yolŋunydja walala waŋa yätjthamana yana, liŋgu dhäruktja ŋunhi walalaŋgu barrpa'na wal'ŋu dhika. Dhärukthu bothinyarayŋuyunydja ŋuli walala märr-yätjthamana wiripuŋunhana yolŋunha, yana mayali'-wilkthun. Yo, walalaŋgu dhäruktja maḏakarritjnha, rakunydhinyamirrina yana, balanyarana bitjan bäpiwu ḻirra;

¹⁴Bitjanna liŋgu walala ŋuli waŋanydja yukurra dhäruktja milnyaŋ'mirrina yana, yakana ŋamakurru.

¹⁵Yo. Yolŋunydja walala ŋuli nyinyaŋdhunmirrina, ga bunharamirrina ŋuli yukurra; Waḏutjana yana walala ŋuli ŋayaŋu-yätjthamanydja yolŋunha, bitjan bumanydja ŋanya rakunygumanydja,

¹⁶Ga guḻku' yolŋu walala ŋuli yukurra nhina galŋa-yätjthirrinydja ga buku-warwunydja, liŋgu dhiyaŋuyi bunharaminyarayuna dhuwurryu.

¹⁷Yakana walala yolŋu'-yulŋu marŋgi nhaltjanarawu nhinanharawu ŋayaŋu-yal'yunarawu,

¹⁸Liŋgu yakana walala ŋuli rom-weyaṉiyirrinydja yukirra nhanŋu Godku.” Ga bitjan yukurra ŋunhi Gunhu'wala Djorra'yunydja ḻakarama yolŋu'-yulŋunhanydja.