Rantayitakirini 12:10-22

¹⁰Rawijanakiri shentawitariri apaani, eejatzi paashini rawijanakiri. Rareetakawo ironta ashitakontsi, ironta ikinantapiintari nampitsiki. Ashitariimotashitanakari. Rawijaneero, rowaaganaka janta awotsiki. Roojatzi rinteenaryaantanakari ronampiri Tajorentsi.

¹¹Riyotakotaa Peetero, ikantzi: “Iroñaaka niyoperotaki rotyaantakinari Nowinkatharite ronampiri raakowentakina rowamaenami Erooreshi. Eejatzi ikimitakowentakina, tsikarika ikantenami nosheninkapaeni”.

¹²Ikenkithashiryaanakiro, roojatzi riyaatantaka opankoki Mariiya, riniro Jowa. Iiteetziri eejatzi Marikoshi. Janta ipiyoeyakaninta osheki aapatziyariri Jesoshi, ikenkithatakagaeyirini Tajorentsi.

¹³Rompojakowitapaakawo Peetero ashitakontsi, rowaga othapikitzirinta: tok, tok. Ari okatziyashitawitanakari onampirentsi oetachari Roore.

¹⁴Iyowaantetawaeri ipaante Peetero, roojatzi okimoshiryaantaperotanaka. Omaanta tee ashitaryaanakiniri, omaanta oshiyashitanaka. Okamanteeyirini kenkithatakagaeyiririni Tajorentsi: —Pokapae Peetero omookinta.

¹⁵Ikanteeyawakironi: —Pishinkiwentashitaka. Eekiro okantanakitzi: —Kyaaryooperotaki. Ikantakiro: —Kaari Peetero, irintakya ronampiri Tajorentsi aminakowentziriri.

¹⁶Eekiro rompojanakitziroroña, tok, tok, roojatzi rashitaryaantaanari. Ari iñeeyawaerini, rotsikanatakari, ikantawakagaeyanakani: —¿Tsika ikinapaeka?

¹⁷Ari rakotashitanakiri, ikantziri: —Pimaerite. Roojatzi ikamanteeyapaerini tsika ikanteeri Awinkatharite, roeyowaantaariri. Eejatzi ikantziri: —Pikanteri Jantyaako, eejatzi pikamanteeyerini ayemijantzinkaritepaeni. Roojatzi ishitowantanaa, riyaatanee imanapithatakari joraaropaeni.

¹⁸Okitejitanaki osheki ikantawakaawenteeyakarini joraaropaeni: —¿Tsikakya ikantanakaka iroñaaka Peetero?

¹⁹Ikowakowatakaantawitakari Erooreshi, tee iñaagaeri. Rojampiiyawitakarini joraaro shentawitariri: —¿Tsikaroña ikinaneeka? Rakanakiri, ikantanakiri: —Taanitya, tsikarika, tee niyotzi; tee noñaawaeri. Ari ikijakiri Erooreshi rirori, rowamaakaanteeyakirini, shemi. Ari roojatzi rookaneero rirori Joreeya, rowaaganaa janta Sesareeyaki, roojatzi ijeekantapaa.

²⁰Ari ikanta Erooreshi ikoshekawakari poñaachari Tziiroki eejatzi Shirooki ikanta ikenkithashiryaagaeyakani ikoshekanewo raakameethateeri, tema ari riyompariteeya. Rotyaanteeyakini jatashiterini rirori. Ikanta jeekapankotziriri rirori rameentaperotanewo, iitachari Waraashito raakameethatawakiri pokashitakiriri. Ikanteeyapaakirini: —Pikanteri Erooreshi: “Paakameethateeri tziirojatzi eejatzi shiroojatzi riyomparityaata, eero pithañaawo royaari”. Ikantziri Waraashito: —Ari, namitakoeyemini.

²¹Ari paashini kitejiri ikaemaeyakirini Erooreshi, raakameethateeyakirini. Rowaneenkatakawo jewawenantatsiri iithaari, ijeekaki janta iwinkatharimentoki. Osheki ikantakaaperotaka ikenkithatakagaeyakirini. Ikantziri: —Eero pikenkithashiryaashita. Nopaeyemini maawaeni koetyeemotayitakimirini.

²²Roojatzi ikimoshireeyantanakani pokaentsiri, ikanteeyanakini: —Kaari irira atziri akemaeyakirini, inta apaani tajorentsi. Kameetharini rirori.