Qoodaabaa 23:5-28

⁵Yaagin Balaami gaanabaa GODAI ayyo yootidi, “Neeni Baalaaqakko simmada, ayyo ha hiraagaa yoota” yaagiis.

⁶Yaagin i Baalaaqakko simmiyo wode, Baalaaqi Moo7aaba halaqatu ubbaara ba xuuggiyo yarshshuwaa matan eqqiis.

⁷Hegaappe guyyiyan, Balaami ba hiraagaa hagaadan yaagidi yootiis; “Moo7aaba kawoi arshsho bagga deretuppe, Sooriyaa biittaappe tana hagaadan yaagidi ehiis; ‘Haa ya; Yaaqooba taayyo qangga! Israa7eela asaa, “Wurite!” yaaga’ yaagiis.

⁸Xoossai qanggibeennaageeta taani waata qanggoo? GODAI, ‘Wurite!’ yaagibeennaageeta taani waatada, ‘Wurite!’ yaagoo?

⁹Taani xoqqa zaallaa huuphiyan eqqada eta xeellais; keran eqqada taani eta be7ais. Eti banttarkka de7iya asa; eti banttana kawotettatuppe issuwaadan qoodokkona.

¹⁰Baanaadan corattida Yaaqooba zerettaa ooni qoodanau danddayii? Harai atto Israa7eela asau oiddantta kushiyaa ooni qoodanau danddayii? Ta haiqoi xillotu haiquwaa mala gido; ta de7uwaa wurssettaikka etaagaadan hano!” yaagiis.

¹¹Yaagin Baalaaqi Balaama, “Neeni ta bolli oottiyoobi aibee? Taani nena ta morkketa qangganaadan ehaas; shin neeni eta anjjadasappe attin, haraba ainne oottabaakka!” yaagiis.

¹²Yaagin Balaami zaaridi, “Taani GODAI tana haasayissiyoogaappe haraa haasayooyye?” yaagiis.

¹³Hegaappe guyyiyan, Baalaaqi a, “Eta neeni be7anau danddayiyo harasaa tanaara hindda. Neeni etappe amaridaagaa be7anaappe attin, eta ubbaa be7akka. Neeni hegan taayyo eta qanggarkkii” yaagiis.

¹⁴Yaagidi Pisgga giyo deriyaa huuphiyan de7iya Xofiima dembbaa ekkidi efiis. Hegan laappun yarshshiyo sohota gimbbiis; gimbbidi issi issi yarshshiyo sohuwan issi korima booraanne issi dorssa orggiyaa yarshshiis.

¹⁵Balaami Baalaaqa, “Taani hinin GODAARA gaittiyo wode, neeni hagan ne xuuggiyo yarshshuwaa matan eqqashsha” yaagiis.

¹⁶GODAI Balaamaara gaittidi kiittiiddi, “Neeni Baalaaqakko simmada, ayyo ha hiraagaa yoota” yaagiis.

¹⁷Yaagin i akko simmidi, ba xuuggiyo yarshshuwaa matan Moo7aaba biittaa halaqatuura eqqidaagaa demmiis. Baalaaqi a, “GODAI yootidobai aibee?” yaagiis.

¹⁸Yaagin Balaami ba hiraagaa hagaadan yaagidi yootiis; “Xippoora na7aa Baalaaqaa denddada ezgga; taani yootiyoogaa siya!

¹⁹Xoossai worddotanau asa gidenna; ba qofaa laammanau i asa na7a gidenna. I yootidi, ba yootidoogaa oottennee? Woikko i ba giidobaa polennee?

²⁰Taani anjjanau azazuwaa ekkaas. I anjjiichchiis; taani hegaa laammanau danddayikke.

²¹Yaaqooba zariyau iitabi yaanabi, Israa7eela asau metoi gakkanabi taayyo beettibeenna. GODAI eta Xoossai etaara de7ees; i etau kawo gidiyoogaa awaajjoosona.

²²Xoossai eta Gibxxeppe kessiis; i mino menttaadan etau de7ees.

²³Yaaqooba zariyaa gakkana biti baawa; Israa7eela asaa qohana murunnoikka baawa. Asai ha77i, ‘Yaaqoobassinne Israa7eelassi Xoossai oottidobaa be7ite’ yaagana.

²⁴Ha asai macca gaammeedan denddiis. Ba oiqqidobaa maana gakkanaashiininne ba woridoogaa suuttaa uyana gakkanaashin, shemppenna gaammuwaadan eti eqqi denddoosona” yaagiis.

²⁵Hegaappe guyyiyan, Baalaaqi Balaama, “Neeni eta mulekka qanggoppanne mulekka anjjoppa” yaagiis.

²⁶Yaagin Balaami zaaridi, “‘GODAI giyoobaa ubbaa oottana’ gaada taani neeyyo yootabeikkinaa?” yaagiis.

²⁷Hegaappe guyyiyan, Baalaaqi Balaama, “Haa ya; taani nena harasaa efaana. Ooni erii, nena yaa efin Xoossai ufaittidi, nena eta taayyo qanggissanaakko” yaagiis.

²⁸Baalaaqi Balaama bazzuwaa bollaara duge xeelliyo Pa7oora Deriyaa huuphiyaa efiis.