Qoodaabaa 1:1-52

¹Siinaa Bazzuwan, Xoossaa Dunkkaaniyaa giddon, Israa7eela asai Gibxxe biittaappe kiyido naa77antto laittan, naa77antto aginan, he aginau koiro gallassan, GODAI Muusa hagaadan yaagiis;

²“Israa7eela asaa ubbaa eta yaran yaraaninne keettan keettan qoodada, attuma asaa eta sunttan sunttan xaafa.

³Neeninne Aarooni yelettoosappe laatamu laittanne hegaappe bollaara de7iya Israa7eelata, olaa baanau danddayiyaageeta ubbata, eta citan citan qoodite.

⁴Zariyaappe zariyaappe issi issi asi ba keettaa asau halaqa gididi, inttena maaddo.

⁵Inttena maaddana asatu sunttai hagaappe kaallidi de7iyaagaa: Zariyaa Keettaa Asaa Halaqaa Roobeela SHade7uura na7aa Eliixuura

⁶Simoona Xuriishadaaya na7aa SHalumi7eela

⁷Yihudaa Aminadaaba na7aa Na7asoona

⁸Yisaakoora Xu7aara na7aa Nataani7eela

⁹Zaabiloona Heloona na7aa Eli7aaba

¹⁰Efireema Amihuuda na7aa Elishamaa7a Minaase Padaaxuura na7aa Gamaali7eela

¹¹Biniyaama Giidi7oona na7aa Abidaana

¹²Daana Amishadaaya na7aa Ahi7eezera

¹³Aseera Okiraana na7aa Paagi7eela

¹⁴Gaada Da7u7eela na7aa Eliyasaafa

¹⁵Nifttaaleema Enaana na7aa Ahiraa7a

¹⁶Ha asati bantta aawatu keettaa asatuppe kaalettanau doorettidaageeta; eti Israa7eela yaratuyyo halaqata” yaagiis.

¹⁷Yaagin Muuseenne Aarooni sunttai xeesettido ha asata efiidosona.

¹⁸Naa77antta aginan koiro gallassi kumetta maabaraa xeesidi, issippe shiishshidosona. SHiishshin asai ba yaran yaraaninne ba keettan keettan odidi, yelettoosappe laatamu laittanne hegaappe bollaara de7iya attumaasatu ubbaa sunttai muleera xaafettiis.

¹⁹GODAI a azazidoogaadan, Muusee eta Siinaa Bazzuwan qoodiis.

²⁰Olau baanau danddayiya attumaasati ubbai, laatamu laittanne hegaappe bollaara de7iyaageeti qoodettidi, huuphiyan huuphiyan xaafettidosona. Eti bantta yaran yaraaninne bantta keettan keettan shaahettidi, hagaappe kaallidi de7iya qoodan mazggafettidosona. Zariyaa Olanchchatu Qoodaa Roobeela (Yaaqooba na7aa bairaa) 46,500

²²Simoona 59,300

²⁴Gaada 45,650

²⁶Yihudaa 74,600

²⁸Yisaakoora 54,400

³⁰Zaabiloona 57,400

³²Yooseefa na7aa Efireema 40,500

³⁴Yooseefa na7aa Minaasa 32,200

³⁶Biniyaama 35,400

³⁸Daana 62,700

⁴⁰Aseera 41,500

⁴²Nifttaaleema 53,400

⁴⁴Muusee, Aarooninne tammanne naa77u Israa7eela zaretu halaqati qoodido asai hagaa.

⁴⁵Olau baanau danddayiya attumaasati ubbai laatamu laittanne hegaappe bollaara de7iyaageeti bantta aawaa keettan keettan qoodettidosona.

⁴⁶Hegeeti muleera 603,550.

⁴⁷SHin Leewa zareti ha qoodettida asaara qoodettibookkona.

⁴⁸Aissi giikko, GODAI Muusa hagaadan yaagiis;

⁴⁹“Leewa zareta qoodoppa; eta attida Israa7eelatu qoodan yeggoppa.

⁵⁰Leewata Xoossaa Dunkkaaniyaa bollaaninne a giddon de7iya miishshatu ubbaa bollan halaqa oottada suntta. Eti he Dunkkaaniyaanne a giddon de7iya miishshata tookkona; eti a giddon oottonanne a yuushuwan dunkkaanona.

⁵¹Xoossaa Dunkkaanee shodettiyo wode Leewati shoddona; Xoossaa Dunkkaanee eqqiyo wodekka Leewati essona. Etappe harai ooninne akko shiiqikko, haiqqo.

⁵²Israa7eela asati ubbai bantta armman armmaaninne bantta citan citan shaahettidi, bantta dunkkaaniyaa dunkkaanona.