Psam 51:1-19

¹Raghani tana kiiwawo Deivid madawara ibera, tomogha kana waghawagha Uraiya wavinena kana waghawagha Betsiba yawata. Na God yana peroveta Neitan noko berana kiiravine ikini na Deivid yanabera kiiravine ivinuwapoya na God biidi mmko parina igirumi. O God, yam nuwayuyuna geiyakovikovina na miisena kubera tagu biidi. Tam nonowa wawaya kwiinuwapoyedi, na berona ayaberabera na kunoghotataveni;

²yagu berona koghataveni, bi yagu tamumu kugigirataveni ware wawaya gara dadabuna sakoghatavenina naboni.

³Berona ayaberabera na akovi, raghani nonowa na iinuwanoghonoghoteni.

⁴Tagu berona tam biidi abera, tam kawagha; yagu kabikwayo matam kamone ibero. Na raghanina kuwonegu bo, “Tam bera berona kubera!” Na tam wonawaghata kwiisisiya. Raghanina aro kunavereguna, tam bera rotomanina kwaberabera.

⁵Yagu tubugha raghanine da kata na tagu tamumu wawayigu, raghanina tagu patana sinagunaki kamokamone na tagu naboni abero.

⁶Bi gegha da kukayoveni da nuwanuwagu kamone wiisuwona iyibonuvigu na noghota miisena nama kuviyevevegu.

⁷Yagu berona ayaberabera na kukoghataveni da anamiise magha; da parapa anapoe wamira.

⁸Kuwonegu da tam kunoghotatavegu na wiisuwona aninuwamiise! Naghove, tam irikegu kugawowora, katana kubera da aninuwamiise magha.

⁹Geyagu berona kunakita kirakiiyedina bi kabitavena tuwanonoyidi.

¹⁰O God, nuwanuwa miisena, bi wouna kuveregu da tam wiisuwone anakivinim.

¹¹Gegha gwabimma kunaporataveguna! Gegha Kanumim Kabikabikuwayina gwabiguma kunakabitavenina!

¹²Kuberagu da aninuwamiise magha, ware dagudagune kuviyawiiguna raghanine naboni; kuberagu da yam sisiya kabisisirenina nuwanuwagu inasisira.

¹³Wasina bi bero berabera wawayidi biiyadi yam keda aniyeveveyana da sinamiiri karona magha tam biidi.

¹⁴O God tam kuviyawiigu, na kata yagu yawa kitara babaraneni bi yam keda rotomanidi kiiravine nuwamiiseye anataworedi.

¹⁵O Bada, kiwiitegu da anisisiya da tam anakabepepim.

¹⁶Tagu ribiribi anagibu da tam biidi anasuwara, bi gegha, noko geyam kayowana, tam suwara noko naboni na gekiiravidiye kuyibabana.

¹⁷Raghanina atoreyowoyena mayegu bi iibabiim da yagu tamumu kunanoghotataveni, na nokodi suwara naboni na tam yam kayowana. O God, gekuyamiimiiri kubutegu raghanina yagu tamumu kiiravine iinuwapoya bi arupari tam biidina.

¹⁸O God yam nuwasisirama na Zaiyon biidi miisena kunabera; bi Jerusalem papana kunayoghana mayeni.

¹⁹Wasina bi wawaya nuwanuwadi miisenama tam biidi suwara sinabera, na tam kuninuwamiise toudi biiyadi. Toudi suwara bogaebogae sinagabuna tam biidi. Bi suwara gabugabunidi kiiravine na kau makidi yam suwara gabugabuna debane sinagabuna.