Psam 139:5-24

⁵Tamna ware gari naboni kuvitumpipinegu, bi imam debaguve kutore da yam maragatama kwabababaregu.

⁶Tam akovigu kabina mma naboni na parapa iragata kirakii da gerubana anakovina.

⁷Tagu gerubana mebo anaverairem ananagho da gekunakitaguna? Getana kubura noko naboni meme. Meghamegha ananono na tam nonowa na nama!

⁸Meboda anagae abame, na tam nama; Bo meboda anarabobo bi sinadogugu, na tam nama.

⁹Meboda anarowoghataveyana ananagho raghani matene gabudara yageegeena kuburidiye, bo meboda ananagho raghani didine gabudara yayoyona kuburidiye make biidi

¹⁰na tam imam maragasina ininaghovegu, bi katiiyam inababaregu.

¹¹Tagu meboda wiididibara ayawoneni da iyikowoyigu bo yeghana ivitumpipinegu na iyididibara magha

¹²Bi gegha da bagune wiididibara kamone, tagu gerubana anakowoyemna. Tam biidi wiididibara na parapa yeghanina ware gabudara. Wiididibara da yeghana tam biidi na mayimayiyidi.

¹³Tam tubuyigu kamona torerereyidi, nuwanuwa da gayama kubera bi sinagunaki raparapane kuvikiikiigu.

¹⁴Bi kubera wiimasiyegu kiiravine na iikiikiivem; bagibagi tupadi kwaberabera na waratetedi. Tagu nuwanuwagu tupanama akovi.

¹⁵Raghanina irikegu kubera, bi sinagunaki raparapane kutoura yapoyapora, bi name wiikowoye ayaragaragata na tam kwakovi da tagu nama.

¹⁶Muriye da ayatubugha na tam kukitagu. Na yagu make yawana gabudaridi kuveregu da anamake, na yam buka kamone kugiruma. Muriye da gabudara dagudaguna iyadagu,

¹⁷O God ipiropiro kirakii da tagu yam noghota parapa anakovidi basuna toudi sipeyara kirakii!

¹⁸Tagu gerubagu da anakabiyavidina basuna toudi parapa sipeyara, gekikira eghana naboni! Bi tupadi kabiyawa kovidina na, augunai da ayamakewaghata tam naboni!

¹⁹God, tagu parapa akayokayoveni da berabero wawayidi kunikasunughana! Kasukasunugha wawayidi gwabiguma kurukwavina tavetaveyana.

²⁰Toudi sisiya berodima sigiboyim; bi kam waghawagha gesiyakabikabi karawayenina.

²¹O Yawe God, tagu iiyawogha sasinighiiyem na asinighiiyedi, da iiyawogha gesiyakabikabi sisiremna.

²²Getana awaki, da nuwapughuma iisinighiighiiyedi, na toudi kagu aviya.

²³O God, kita rughuwona da nuwanuwagu kunakita bi kuruyaghagu da yagu noghota kunakovi.

²⁴Bi meboda berabero wawayidi yadi kedagha ananono na kiyevevegu, bi yawa makewaghawaghasina kedane kinaghovegu anapiika tam biidi.