Psalms 9:1-20

¹I MEN kapina Ieowa jan nan monion i meler, o kajokajoiia duen japwilim omui dodok kapuriamui kan karoj.

²I men pereperen o polauleki komui o kauleki mar omui; komui me lapalapia,

³Pwe re kotin kaloedier ai imwintiti kan, irail pupedier o melar.

⁴Pwe re kotin apwali ia ni ai pun o ai dodok. Komui kaipokedi pon mol omui duen jaunkapun pun amen.

⁵Kom kotin kapun on men liki kan o kotin kamela me japun kan, kom kotin kawelar mar arail kokolata.

⁶Imwintiti o joredier, a namenokalar melel. Komui kotin wuketedi kanim akan; o jolar, me pan taman irail ada o tou ar akan.

⁷A Ieowa pan kotin kaunda kokolata. A kotin kaonopada mol a, pwen kadeikada.

⁸O a pan kotin kadeikada jappa ni pun, o kakaunda wei kan pun.

⁹Ieowa jile pan me jamama kan, jilepa ni anjau apwal.

¹⁰I me irail, me aja mar omui kin liki komui, pwe komui jota kin muei jan irail, me kin rapaki komui, Main Ieowa.

¹¹Kauleki Ieowa, me kin kaunda nan Jion. Komail padaki on wei kan a wiawia!

¹²Pwe a kotin taman irail ada o kotin kainoma nta ’rail. A jota kin kotin maliela likwir en me jamama kan.

¹³Main Ieowa, kom kotin maki on ia. Re kotin mani ai apwal ren ai imwintiti kan, kom kotin dore ia la jan nan wanim en mela.

¹⁴Pwe i en kajokajoiia duen omui dodok kapuriamui pan wanim en nain Jion, perenki jauaj pa om.

¹⁵Men liki kan pupedi on nan por o, me pein irail weiradar, o nä ’rail lodi on injar, me pein irail wiadar.

¹⁶I me kitail ajaki, Ieowa me kotin kapun pun. Me japun kan jalidi on pein ar dodok en pa ar akan. Jela.

¹⁷Me japun kan en lokidokila nan wajan mela, o men liki kan karoj, me kin monokela Kot.

¹⁸Pwe me jamama o jota pan monokinokla kokolata, o me luet akan jota pan kaporoporeki mal kokolata.

¹⁹Main, kom kotida! Pwe aramaj ender pwaida, a men liki kan karoj en pakadeikada mo omui.

²⁰Main, kotiki on ir men kamajak, pwe men liki kan en dedeki, me re udan aramaj eta. Jela.