Psalms 94:4-19

⁴Nuna nunumi patawura ko den balu balu geragasan; ale nunumi ninguru patawusan.

⁵Yawe, nuna nika kariimet nunga eresan nongorak kapasan, kariimet nika ma nunga balem wore nunga bita maguwusan.

⁶Nuna imet gera mu se, kariimet iwareng tai nangarak bagara mu nunga mosan se kuesan, kuriang marmar mu agotala nunga mosan se kuesan.

⁷Ale balsan, “Yawe me arigiso; Jacob ko Kaem mel ana bitawasan mu tawun biya me ko ikia taso,” masan.

⁸Nina kariimet sikina alo, awuk se suwutata nguala sipa lagasan? Nina amaru te ikia ningo tal ale sinararalko?

⁹Kaem nu ana nadogowa nungam mu nu kota due mena agi? Nu tala namotam nungam mu nu kota motam mena agila?

¹⁰Kaem ali lilim munan tuiwoso mu, memek koma bu me ningaruk agi? Nu ali lilim ko kausa kari se, awuk, nu kota pa ikia ko tukunangaram agi? Mena.

¹¹Yawe nu kariimet suen la nunga ikia mu iki ari saposo; nu ko ikiso mu nononga ikia mu mel yam iwita.

¹²O Yawe, kariimet ni ka munan den te nunga kiti gurugusam ale nunga dingumusam mu amilmilamonko.

¹³Nuna ikup gisan, bare ni nunga sangorsam, ale nongorak bagasam la, kager kari memek mu mutim ningi nama sapasan.

¹⁴Yawe ko kariimet me ta nunga bitiruk ale me ta buring gurugu nungarukko, mena.

¹⁵Buta se ikup te nunga ko munan mu aking diram la aratuk se kariimet munan diram la karo tusan mu amilmilamonko.

¹⁶Awiri ani ago ko barasuk ale kager kari memek nunga menawurokko? Awiri ani ago ko sanamaruk ale kiwem memek betera ko kariimet nongorak barimarukko? Kariimet bo mena. Yawe kota suanta.

¹⁷Se nu ani me aga saongam le mu, ani maingkala kuera mutim ningi aniwasam le.

¹⁸Ani asiwik palengam se “dagulasam” maem, bare Yawe, ni kua aisem ale agiting duap ningi aga iluwem.

¹⁹Tom ani angamang motam kapakaso se magiwakasam mu, ni angamang motam patawukasam ale amilmil aisukasam.