Psalms 92:1-12

¹(Wur imi Sabbath tom ko wur) O Yawe, mel biya aninga angamang motam ningi mu ani amilmil ni kisek ale nip patawurik, ale wur duap duap nika nip te iluwekko, O aninga Kaem Kalel Biya.

²Turomola pempem mu nika kua ana nangara ko munan mu ko balu pagik, ale tirom mu nika gemang nunguningkiri nangara ko munan mu ko balikko.

³Ale bawe se gita mel te yagowom yawara gurugek ale nika nip patawurikko.

⁴Mu awuk, nika kiwem bibiya te ani amilmil aisisam; se ani nika ura bibiya ni keta kiting te beterem mu ko amilmil wur ilusam.

⁵O Yawe, nika ura mu bibiya se yawarakala; nika ikia mu du biya, kalel biya, se ulal biya nunguningkiri!

⁶Kariimet ikia ningo nongote mena mu me ta ko ikimonko; kariimet ngualara sipira mu me ta ko sinarmonko:

⁷kariimet memek mu sirsir iwita pagamon, se memek bitawara ko kariimet mu yawarakala ko barasamonko, bare nuna me ikisan, nuna memek biya tamon ale menara biya menamonko.

⁸Bare O Yawe, ni keta kalel biya nunguningkiri, ni pempem bagasam.

⁹Nunguningta nunguning, kari ni kerak barimasan mu mena namamonko; memek bitawara ko kariimet mu parasa namamonko.

¹⁰Bare ni sokel aisem se aninga asokel mu buffalo diwang ko sokel iwita; ni amilmil ningo wore aisem se ani amilmilasam.

¹¹Ani amotam te aga kager kari memek alo ikup yaman giman se nungarkem; ale adogowa te niaman se nunga niara ikiem.

¹²Kariimet ningo diram bagara mu tam ningo naur iwita aragamon, ale Lebanon ko tam aora sida mu iwita tarigimonko.