Psalms 89:8-43

⁸O Yawe, ni Kaem Sokel Garagar, bo sokel ago nika iwita mena; nika den suen la mu diram la karo tusam.

⁹Ni gagi lilim la bitaruwasam; ale tom ko tamun bibiya duruk iwita barasoso mu ni lila awusam ale malin tusam.

¹⁰Ni gagi ko mel memek Rahab ko sokel menawurem; iwitatala, nika sokel aora garagar mu te kager kari memek nunga menawurem.

¹¹Duruk wonong se ali imi mu am nika la; ni keta ali imi se mel suen la awote mu nungem.

¹²Ni keta koma worem te basuso mu nungem, ale aking te nama kaposo mu nungem tala. Se duruk ilagala Tabor se Hermon mu wur te amilmil kisisan.

¹³Ni yam sokel garagar! Nika sokel mu yam aromemek se kalel biya!

¹⁴Ni kiwem ningo diram se tutera ningo mu nika barim, te ira sanamasam; ni ka munan me gurugusam patawusam, mena, nika kariimet ninguru nunga kuesam, ale ka den nunga manem mu diram la karo tusam.

¹⁵Yawe, kariimet nika nip patawusan ale nika munan yawara mu ko nikim ningi kerak kapetasan mu amilmilamonko.

¹⁶Kariimet imitang mu ni ko ko pempem irua amilmil te bagasan, ale nika munan ningo mu ko ka nip patawusan.

¹⁷Mu awuk, ni ka nikim se ka sokel aora garagar mu te nanga sangorsam; nika gemang motam nangara ko munan mu te nanga king nup biya tuem.

¹⁸O Yawe, ni keta anananga karem bagasam; ni Israel ko Kaem Laili, se ni keta king ana nangarem.

¹⁹Girakala, ipingira bo te, nika kariimet alo iwita nunga manem, “Ani nenenga kari nuar bo atumukirem ale sokel tuem; nu nenenga kari dom ko bagarukko.

²⁰Ani aga ura kari David arigem ale tam muguri ko welang laili mu supuling te warem, ale marak tuem.

²¹Ale ani nu kuting duap ningi nunguning iluwek ale aninga sokel nu tuek se nu sokel karogo bagarukko.

²²Kager kari memek nu ilak kagermon mu me ta kiamonko; kariimet memek bitawara mu nu ilak me terong mamonko.

²³Ani noko kager kari memek nunga menawurik ale awiriya nu me ko kuesan mu nunga moa parusuwurikko.

²⁴Ani nu angamang tuek ale ilak bagarikko; ani pempem la nu sangik se nu sokel ago se nup biya karogo bagarukko.

²⁵Ani noko kingdom ulal awurek se gagi yu luan bibiya kiaruk ale sor saki te ago namarukko.

²⁶Se nu aninga manuk, “Ni aninga Ait, se aga Kaem; ni aninga Bitua se aga Saonga Kari,” maukko.

²⁷Ani nu aninga kuriang kari giram bilangaram ko iwita bitirikko, se ali imi ko king suen la nunga kiarukko.

²⁸Ani angamang motam mu noko pempem anirukko; ale den nu ilak kalem mu tom suen biya anirukko.

²⁹Se noko kuriang gue luan udagi mu aora biya bagamonko; noko kingdom mu taiti gomang aora biya aniso iwitata pempem anirukko.

³⁰“Bare noko kuriang gue aninga munan den me karo tumon, ale munan den baluwoso iwita me karomon,

³¹agi aninga den suen biya mel yam ko betemon, ale aninga kiti guruga ko den ko me sinar tamon,

³²mu asele nunga memek koma bu nungarikko; ani nunga memek koma yaman ikup nungarikko.

³³“Bare aninga angamang David ko kua tuata mu me ta bita taikko; ani saruk nu ilak kanuwem mu uwutata anirukko.

³⁴Aninga den nu ilak kalem mu me ta kulukek, agi ko ponor bo me ta gurugekko, mena.

³⁵Agata aga aip laili nunguningkiri mu te saruk nu ilak kanuwem mu uwutata anirukko; ani David me ta kulekko:

³⁶Noko kuriang gue luan maiya kaparuk ale maiyukko; noko kingdom mu sokel tuek se tom suen biya anirukko, worem nikim kapa lagoso iwita,

³⁷se sige taiti gomang te kani lagoso iwitatala.”

³⁸Bare Yawe, ni kari keta king ko beterem wore ko gemang magaram; se ni nu merem ale biring tuem.

³⁹Nika ura kari ilak den kalem umu kulukem, ale noko king ko kitigat mu ali gege ningi saperem.

⁴⁰Ni noko wonong ko por bibiya parusuwurem maguwurem, se noko kawam aora bibiya mu papak mam kapa saparam.

⁴¹Se awiriya noko sor wonong mu duap te lage umu karo nama se, mu noko melmasak tere gi ago namasan; se ali sor saki ko kariimet alo mu nu gusiru gilingisan.

⁴²Ni kari nu ilak kagerawara mu aking sokel nungarem, se aitak nuna ninguru amilmilasan.

⁴³Ni noko kager ko melmasak sokel menawurem, ale kager te nu me sangem.