Psalms 89:12-41

¹²Komui me kotin wiadar pali apon o pali air, Tapor o Ermon kin nijinijki mar omui.

¹³Lim omui me mananan o kumut en lim omui me rojon, lim omui pali maun me ileile.

¹⁴Melel o pun iei pajon en mol omui; kalanan o melel kin tion mo omui.

¹⁵Meid pai aramaj kan, me aja nijinij! Ieowa, re pan weweid ni marain en jilan omui.

¹⁶Re kin polauleki mar omui jan ni manjan lel jautik, o re kin pwai kida omui pun.

¹⁷Pwe linan en ar kelail komui, o komui pan pokada oj at.

¹⁸Pwe Ieowa pere patail o me Jaraui en Ijrael, i atail Nanmarki.

¹⁹Maj o kom kotin majanier ki kajanjal kai on me lelapok kan: I kamanadar me Lapalap amen, I kajapwiladar pilipildar amen jan ren aramaj akan.

²⁰I diaradar ai ladu Dawid, I keiekidier i ai le jaraui.

²¹Pa i pan kolekol i, o pa i pan kamanada i anjau karoj.

²²Imwintiti kan jota pan kak widin on i, o me japun kan jota pan kak kaloedi.

²³I pan kamela me palian i mo a, o I pan kaloke ir, me kailonki i.

²⁴A ai melel o kalanan pan mi re a, o ni mar ai oj a pan pokapokada.

²⁵I pan ki on pa a, en kaunda madau, o pa a maun, en kaunda pil akan.

²⁶A pan likwir don ia: Komui Jam ai, ai Kot, o paip en maur i.

²⁷O I pan wia kila i nai mejeni, ileila jan nanmarki en jappa kan.

²⁸I pan kalanan on i kokolata, o ai inau on i pan duedueta.

²⁹I pan ki on i kadaudok a kokolata, o mol a pan warai dueta lan.

³⁰A ma na kan pan muei jan ai kapun, o re jota pan weweid ni ai kujoned akan,

³¹Ma re pan kajaminela ai tiak kan, o jota peiki on ai kujoned akan,

³²I ap pan kaloke kin ir ar katiwo ki jokon pot, o pan woki ir, pweki ar japun.

³³A I jota pan kiwei jan i ai mak, o ai melel pan mimieta re a.

³⁴I jota pan kawela ai inau, o I jota pan kawukila, me kowei jan nan au ai.

³⁵I kaukilar ai jaraui pan me pak, me I jota pan likam on Dawid:

³⁶Kadaudok a pan joutuk, o mol a dueta katipin mo i.

³⁷A pan duedueta dueta jaunipon; o jaunkadede nan tapok kan me melel. Jela.

³⁸A met komui kajapokela o onioni japwilim omui me keidier.

³⁹Kom kotin kajela inau en omui ladu, o kom kotin kajaminela mar a.

⁴⁰Kom kotin karonk pajan a kel akan karoj, o kawelar a im teneten kan.

⁴¹Karoj me daulier waja o kulia janer; a wialar kankaurur on men imp a kan.