Text copied!
CopyCompare
Bible Ni Thothup - Psalms - Psalms 78

Psalms 78:7-63

Help us?
Click on verse(s) to share them!
7Ni aray rogon ma aram e bay ra ted e pagan’ rorad nga daken Got ma dab ra paged talin e n’en ke rin’, ma gubin ngiyal’ ni bay ra ted u gil’ e tin ke ta’chiylen.
8Dab ra boded e pi chitamangirad kakrom, ni bogi girdi’ ni yad ba tatogopluw ma darir folgad, ni de muyluy e pagan’ rorad ngak Got, ma darir pired ni yad ba yul’yul’ ngak.
9Pi Efraimite, e ra feked e gat’ing nge gan e gat’ing, miyad mil e rofen ni ngan mael.
10Dar ayweged fare m’ag u thilrad nge Got; mra siyegned ni ngar folgad ko motochiyel rok.
11Kar paged talin e n’en ke rin’, fapi maang’ang nra guyed ni rin’.
12I rin’ Got fapi maang’ang u p’eowchen e pi chitamangirad u lan e tafelfel’ u Zoan ko nam nu Egypt.
13I sey e day nge fekrad nga barba’; i suweg e day ngalang ni bod ruraba’ i rungrung.
14Me rran me pow’iyrad nga bang i manileng mra nep’ ma ram’en ba nifiy.
15I sey e war u lan e ted ni desert nge pi’ e ran riy ngorad.
16Me k’aring e ran nge map’ ko fare war me gagiyegnag nge thang’el nga but ni bod ba lul’.
17Machane dartalgad ko denen nib togopluw ngak Got, mu daken e ted ni desert e ra togopluwgad riy ngak e en ni Th’abi Tolang.
18Nri lanin’rad ni ngar sikeng niged Got ko ggan ni yad ba’adag ni yad be ning.
19Ur nonod nib togopluw ngak Got, ni be lungurad, “Rayag rok Got ni nge yagnag e ggan u daken e ted ni desert?
20Riyul’ ni pirdi’iy fare war nge po’ e ran riy, machane gur, rayag rok ni ngki pi’ e flowa ngodad me pi’ e ufin ngak e girdi’ rok?”
21Ma aram e nap’an ni rung’ag SOMOL e n’en ni yad be yog mri damumuw; me cham ko girdi’ rok ko nifiy, mri gel e damumuw rok ngorad,
22ya dariy e michan’ rorad ngak ma de mich u wan’rad nra ayuwegrad.
23Ma aram me non ngalan e lang nge yog ko pi mab riy ni nge mab;
24i pi’ e grain u tharmiy ngorad, me pu’og e manna nga but’ ni ngar ked.
25Ere ra ked gan e pi engel, me pi’ Got ngorad urngin ni yad ba’adag.
26Miki gagiyegnag e nifeng nge thow ko ngek, ma gelngin e k’aring e nifeng ko yimuch;
27me pi’ e arche’ nga but’ ko girdi’ rok, ni bod feni yo’or e yan’ u p’el’ay;
28me mul mul fapi arche nga lulukngun fa gin ka ra pired riy ni liyeg e pi tent rorad.
29Ma aram me abich fapi girdi’ ngar fosgad; ya ke pi’ Got ngorad e tin yad ba’adag.
30Machane ka dawori gaman u wan’rad ma nap’an ni ku yad be abich,
31me damumuw Got ngorad nge thang e fan rok e pi’in nib gel u fithik’rad, ni tin th’abi cheag e pagel nu Israel.
32Yug aray rogon urngin e pin’ey ma fapi girdi’ e dartalgad ko denen; dariyfan e pi maang’ang ya de pagan’rad ngak.
33Aram me museg e rran rorad ni gowa bbuwchuth i nifeng ngarm’ad nib tomgin.
34N’apan nra li’ bochiyad, me cheal e tin kabay ngar sulod ngak; miyad pi’ keru’rad ko denen rorad miyad parnag e meybil.
35Me yib ngan’rad ni Got e i yoror rorad, ni en ni Gubin ma Rayag Rok e i yibnag e ayuw ngorad.
36Machane u rogned e thin ni fel’faen; dariy ban’en nrogned nib riyul’.
37Dar yul’yul’gad ngak; ma ku dar yul’yul’gad ko fare m’ag ni bay u thilrad.
38Machane Got e ma runguy e girdi’ rok. I n’agfan u wan’ e denen rorad made thang owcharad. Ba yo’or yay ni i k’adan’ ko damumuw ngi i par nga daken gelngin e damumuw rok.
39Me yib ngan’ ni yad e kemus ni yad e girdi’, ni yad bod e nifeng ni thow me m’ay.
40Rib yo’or yay nra togopluwgad ngak u lan e ted ni desert; bo’or yay nra kireb niged lanyan’!
41Ur sikeng niged Got u bayay nge bayay, ngu’ur amith niged lanyan’ fare Got nib Thothup rok yu Israel.
42Ra paged talin gelngin nib gel nge fa rofen ni chuwegrad u pa’ e to’ogor rorad
43me ngongliy bogi ban’en u fithik’ e sorok nge maang’ang u lan e tafelfel’ u Zoan u lan yu Egypt.
44I pilyeg e yupa i lul’ nge ngal’ ni racha’, nge par piyu Egypt ndakriy e ran ni ngar unumed.
45Me pi’ e lal nge yib nga fithik’rad nge gafgow nagrad nge kayru ni gathay taferad.
46Me pi’ Got e asmen’ing ni lokust nge longuy e woldug rorad me kirebnag e yungi flang rorad.
47Me thang owchen e woldug rorad ni grape ko ayis nma mul mul ni bod e malang me li’ e gek’iy ni fig rorad ko ayis nike el.
48Me li’ e pi garbaw rorad ko ayis nike el ni bod e malang me li’ e yuran’ i gamanman rorad ko uluch.
49I k’aring e tagnan’ ngorad nib gel u mirin e damumuw rok ni pu’og, ni yib ni bogi tamal’oeg ni nge mogothgoth.
50Da ki luf bang ko damumuw rok ara ayweg e pogofan rorad, i li’rad ko gechig ni pag ngorad.
51Me thang owchen e tin nganni’ i fakay ni pumo’on u gubin e tabnaw nu Egypt.
52Ma aram me gafaliy e girdi’ rok nga wuru’ yu Egypt ni bod ba tagafaliy e saf ni pow’iyrad u daken e ted ni desert.
53Dar rusgad ya i pow’iyrad ni dabi buch ban’en rorad; machane, day e yib nge tharey e pi to’ogor rorad.
54Me fekrad i yib ko nam rok nib thothup, ko pi burey ni Ir e kol.
55I tuluf e girdi’ riy nnap’an ni be yib e tirok e girdi’ i yib; me f’oth e binaw rorad u pa’ e ganong nu Israel me pi’ taferad ko tirok e girdi.
56Machane kur pired ni yad be togopluw ngak Got ni Gubin ma Rayag Rok ma yad be sikengnag. Tin ni i yog e darir folgad riy,
57ya ur togopluwgad ma kuyad bod e pi chitamangirad kakrom nde ryul’yul’gad, ni gowa ba gan e gat’ing nib bugbug ni dabyag i pagan’uy ngay.
58Ra k’aringed e damumuw ngak ko yungi n’en ni yad be tayfan boch e got riy, nge pi liyos rorad ni kari gelnag e damumuw ngak.
59Ri damumuw Got nnap’an ni guy e ran’ey, ma aram mri n’ag e girdi’ rok.
60Me n’ag e tent rok nu Shiloh, ni aram e gin ni tafen ni i par riy u fithik’mad.
61Me pag e pi to’ogor romad ngar koled fare Kahol ko M’ag, ni aram e pow u gelngin nge felngin.
62I damumuw ngak e tirok e girdi’ me pagrad nge li’rad e pi to’ogor rorad.
63Pi’in pagel e nli’rad u fithik’ e mael, me par e pi’in rugod ni dakriy be’ ni ngar figirngiyed.

Read Psalms 78Psalms 78
Compare Psalms 78:7-63Psalms 78:7-63