Psalms 78:1-19

¹(Asaph wur imi batogam) O aga kariimet, nina aninga den ikialko; nedegawa ninguru gurugal ale den ani balikko ewere ikialko.

²Ani mel girakala aratukaso wore sang balik se ikial ale te sinar palagalko; ale mel saki nengete yumura wore ninguru ko ikialko.

³Girakala anananga girigir alo ko nanga manorman, se nadogowa ikiam se ko ikiman.

⁴Ana den umu kuriang nongoma te me kaluwunakko; kuriang gue udagi mu nunga manornak ale Kaem ko sokel aora garagar se ko kiwem bibiya duap duap mu me kaluwunakko.

⁵Kaem ko munan den Israel kariimet nungaram, nu Jacob ko kuriang imas munan den imi karo tumonko nungaram. Nu girakala anananga nanangatak alo iwita nunga maonam, “Nina aninga munan den imi ninguru ninga kuriang imas nunga kausalko,” mam.

⁶Uwuta mu kuriang gue maingte aratamon mu, nuna karogo tala ko ikimon ale aking nunga kuriang gue te mu nunga kasurmonko.

⁷Nuna uwuta betemon mu asele, kuriang luan udagi mu Kaem ko nongomang ningi nunguning aruk, se nuna nu mel bibiya nungam mu me ta ko nungamili saparuk, se ko munan den kasik la mu karo tumonko.

⁸Nuna nunga taleng girigir alo nusupuling lagakaso iwita me bagamonko. Taleng girigir alo mu noko den sawarukasan ale noko nongomang ningi me nunguning akaso, se ko den me karo tuikasan.

⁹Ephraim digo mu gatu mare karogo, bare kager barasam mu nuna nagu sapaman.

¹⁰Kaem den nongorak kaolam mu me karo tuman, ale ko munan den mu karo tumonko nongomang me anikaso.

¹¹Nuna munan bibiya nu beteram mu ko nungamili saparam, ale kiwem bibiya nongoma te beteram mu karogo ko nungamili saparam.

¹²Nu garuk nomotam te kiwem bibiya duap duap bitakaso; kiwem mu ali sor Egypt se kuwim Zoan mu te bitakaso.

¹³Kaem gagi pagaru ilagala awuram, duruk iwita koma singsang awuram, ale Israel nongorak kusumuri tairam.

¹⁴Kowarkalal mu taiti nuwi ningi baga se taiti nuwi iwita girikaso; ale tirom mu tama nikim iwita kanikaso ale girikaso.

¹⁵Nu sor maraka garagarayam te manga pakakumukaso se yu kapakaso se nokasan ale yu ko me tukunangakasan.

¹⁶Nu nungam se yu gotek bo manga ningi bausam, ale yu biya bo iwita naguram koropong kaoram ale kaparam.

¹⁷Bare nuna Kaem Kalel Biya mu koma te memek tawun biya bitakasan; nuna sor maraka te baga se nusupuling lagakaso.

¹⁸Nuna ko iki se wore Kaem ira ariga te bitakasan; nuna na ko kuakasan ale na nungarukko sail te ko balukasan.

¹⁹Nuna Kaem ilak barimakasan ale balukasan, “Kaem pa sor maraka iwita te inang suen biya nangarukko terong agi?” makasan.