Psalms 74:4-17

⁴Pi to’ogor rom e kar garus niged e gel ni kar ted u Tempel rom; kar ted e flak rorad ngaram ni pow ko gel ni kar ted.

⁵Yad bod e pi tadimow ren ni yad be toy e gek’iy nga but’ ko tow rorad.

⁶Kar t’ared gubin e palang ko tow nge amma rorad.

⁷Kar bilged e Tempel rom kar paged e nifiy ngay; kar dariyfan niged e gin yima liyor ngom riy.

⁸Yad ba’adag ni ngar thirfed gamad u but; kar urfiyed nga but’ gubin yang nib thothup u lan e nam.

⁹Urngin e pow ni thothup romad e dakriy; ma de magach ta’reb e profet, ma dariy be’ ni manang n’umngin nap’an me mus e ran’ey.

¹⁰A Got, bu uw n’umngin nap’an ni ngi i minmin e pi to’ogor romad ngom? Ngu’ur dariy fanaged fithingam ni manemus?

¹¹Mangfan ni kam siyeg ni ngam aywegmad? Mangfan ni kam m’ag pa’am nga ker’um?

¹²A Got, ya gur e pilung romad ko tobolingin i yib; bo’or yay ni kam ayuwegmad.

¹³Gelngim nib gel e mu ki’eg e day ngay, mag bilig lolugen fapi kan nu maday;

¹⁴mu bilig lolugen fare kan ni Leviathan mag pi’ ufin nge languy e gamanman nu ted.

¹⁵Kam tay e pi alublub nge pi athang’el ngi i map’; ma kam mliknag lan e pi lul’ ni gagang’.

¹⁶Gur e mu sunmeg e rran nge nep’; kam tay e yal’ nge pul nga tagil’.

¹⁷Gur e mu duwgiliy e yungin ni nge mus e fayleng riy; gur e mu tay ngilan’ e summer nge winter.