Psalms 71:10-23

¹⁰Pi to’ogor rog e yad ba’adag ni ngar li’edgag ngum’; ma yad be non ma yad be makath nigeg.

¹¹Yad be ga’ar, “Ke n’ag Got e cha’nir; are da leked ngad koled, ya dariy be’ nra ayuweg.”

¹²A Got, dab mu palog rog; Got rog, mu gur nigem ngam aywegeg!

¹³Mang e yigi waer min thang mit e pi’in yad be cham ngog. Mang e yigun tamra min ma’fannag e pi’in yad be guy rogon ni ngar maad’adgad ngog.

¹⁴Bay gu tay e pagan’ rog ngom ni gubin ngiyal’; bayi yo’or yay ni ngu’ug pining e sorok ngom.

¹⁵Bay gu weliy fal’ngim; polo’ e rran ni bay u gog rogon ni ga ma mat’aw nigey, ni yug aram rogon nde gaman e nangan’ rog riy.

¹⁶Bay gu wan u gelngin SOMOL ni Got; bay gu weliy fal’ngim, ni kemus ni gur.

¹⁷Kugub bitir ma ga tabab i fonow nigeg, ma ku gu be weliy feni manigil e ngongol rom.

¹⁸A Got, chiney ni kug pilibthir ma ke mat lolgeg, e dab mu n’igeg! Mu par rog ko ngiyal’ ni gu be weliy gelngim nge fenam gel ngak gubin e mfen ni bayib.

¹⁹Got, fenam mat’aw e ke taw nga lanelang. Gur e kam rin’ bogi maang’ang; dariy be’ ni bod gur.

²⁰Gur e kam l’oeg e oloboch nge gafgow ke yib ngog, machane bay mu fulweg gelngig ngog; bay mu teg u orel ko low ko yam’.

²¹Bay mu gagiyegnag nge gilbugwag boch ko kafram; ma ga fal’eg lanin’ug bayay.

²²Ri bay gu pining e sorok ngom ko musik ni harp; Got rog, bay gu pining e sorok nga fanam yul’yul’. Talin e musik ni harp rog e bay gu chubeg ni fan ngom, I gur e En Thothup nu Israel.

²³Bay gu tolulnag e felfelan’ ko ngiyal ni gu be musik nigem; bay gu tang u polo i lanin’ug ni bochan e ka mu ayuweg e pogofan rog!