Psalms 69:1-17

¹(David ko wur) O Kaem, aga sangaruko, yu bausam adogotak te se sarenga namarikko tom pingi aram!

²Ani yu lom biya ningi kaperem ale sanamarikko me terong; yu lom biya aga ira kaluwurokko tom pingi aram.

³Ani ai nia lagerem ale angimik sail menaram ale adogotak maraka saparam. Ni aninga Kaem se ni aga sangaruko amotam bita lagasam, bare yam mena biya.

⁴Kari ani agarak memek betesan, mu yam kumik duap bo mena biya; nuna suen biya, amone asupuling te mu ko tom kiaram; nuna suen biya se den kawel ago ko balsan ale aga momon se kuerikko ago kaesan. Ani nunga mel bo me tere naem, bare den ipi atumu aisiman, se ani agata aga mel mu koma ko nungarem.

⁵O Kaem, ni aninga memek mu ari saperem; aninga paguwura mu ni ko iki saperem.

⁶O Kari Biya, ni Yawe Sokel Garagar, yam agarkiwer se ani dagulek se nika kariimet ningo me nongomang ikuwurokko; nuna ni ko ko nongomang pempem niawoso se me dolomonko, O Israel ko Kaem.

⁷Ani ni la karo kisisam, buta se ani agarki maguwu gilingisan, se ani dolara ninguru aga iramuram.

⁸Aninga gue suan se aga launuria alo mu ani nononga bo iwita me agarkasan;

⁹mu awuk, aninga angamang motam mu nika temple ko tawun biya kueso ale tama iwita kani lagoso, kariimet nika balu maguwusan mu ani agotala aga balu maguwusan.

¹⁰Tom ani aimi karogo kapasam ale inang kaola ko munan karosam mu kariimet aga balu maguwusan.

¹¹Ani angamang batagoso se aimi karur tugusam ale amone guari pagoso, mu nuna aninga gusirsan.

¹²Kariimet lage te ilu biguwusan ale aninga ko munakasan, se yu aora nana ale ngualara ko kari mu wur memek ani ago ko ilusan.

¹³Bare O Yawe, aninga guranek nikate betesam. Ni ani ago ko ninguru kuesam, ale tom ni keta ko ikiwasam mu te aninga guranek koma aisuko; ni aga sangaru toko den kalo beterem mu te aga sangaru toko.

¹⁴Ni aninga tagi bataguru to se ani lom gege ningi me sarenga namarikko; ni aninga bitaru se kager kari memek me aga maguwumonko.

¹⁵Ni aga sangaru se lom me aga tagirokko; ni aga sangaru se yu du biya ningi me sarengik, ale mutim ningi me kua namarikko.

¹⁶O Yawe, agiring ilupko, nika kua aisa biya mu ko ningo te aga sangaruko; nika gemang lila ningo mu te kema gurugu aisuko.

¹⁷Biring gurugu nika ura kari me tuiko; ani ikup biya ningi kaperem se ni tairate tai aga sangaruko.