Psalms 68:10-24

¹⁰Pwe japwilim omui pwin diar waja, me a kak kotikot ia. Main Kot, kom kotin apwalilar me luet akan duen omui kalanan.

¹¹Ieowa kotikidier a majan ki pwin en wanporon kalaimun akan.

¹²Nanmarki en karij toto tan wei madan, o waun im akan nek pajaner, me re atia jan ar imwintiti kan.

¹³Ni omail kairu nan pun en noumail pwin man akan, komail rajon pa en muroi men, me linan dueta jilper o pa a kan dueta kold linan.

¹⁴Ma me Manaman o lao kotin kamueit pajan nanmarki kan, nana Jalmon rotorot ap pan marainla.

¹⁵Nana Pajan iei nana en Kot; Pajan nana kalaimun eu.

¹⁶Menda komail nana kalaimun akan kin kilekilan ap peirin on nana, me Kot kotin piladar en kotikot ia? O Ieowa pan kotikot waja o kokolata.

¹⁷War en Kot me kid toto pan pak kid; Ieowa kotikot re ’rail ni nana Jinai.

¹⁸Komui kotidalan poa o jaliedier me jalidi kan, o kom kotin ale on aramaj pai kan, pil on ir me katiwo kan, pwe Ieowa en kotikot waja o.

¹⁹Kapina Ieowa nin ran akan karoj; Kot kin kotiki on kitail katoutou patail, ap pil kotin jauaja kitail. Jela.

²⁰Atail Kot iei jauaj patail, o Ieowa Kaun kin kotin dorela jan mela.

²¹Melel, Kot pan kotin kawela monan a imwintiti kan, o a pan kotin lejer pajan takain monan ir, me dadaurata ar katiwo.

²²Ieowa kotin majanier: I pan kapure don ir jan nan Pajan, I pan wa ir do jan nan kapin madau;

²³Pwe koe en tiakedi on nan ntan imwintiti kan, o noum kidi kan en tamotamo.

²⁴Main Kot, a janjal duen omui kotikot jili, duen omui kotikot jili nan mol omui jaraui, ai Kot o ai Nanmarki.