Psalms 60:1-11

¹(David ko wur, kariimet nunga kausa ko. David sor Aram Naharaim se Aram Zobah ko kariimet nongorak kageraram ale wur batogam. David ko kager supuling Joab kager te pila se, Edom kari twelve thousand, sor wolong “Valley of Salt” masan mu te nunga moram se kueman.) O Kaem, ni ana nago ko gemang magaram se biring gurugu nangarem se kager utu naguram ale nasokel menawuram; bare akingtala nanga sangaruko!

²Ni wanara sor maguwu kam anananga ali yukuem, se papak mam woselaram ale yukuawoso; bare tair ale nunguru burangir se kuwim kuwim te aking pelerukko.

³Ni ana nika kariimet ikup ninguru nangarem, se kariimet yu aora nana ale dagulu barasukam ana dagulu barasuwasan.

⁴Bare ni gatu supuling se ka gatu patawurem, kariimet ni bowa ningi bagara mu tai nikate la biguwumon ale kager ko sokel iru tamonko.

⁵Ni ana ninguru nanga kuesam, bore te se ka sokel te nanga sangaru toko.

⁶Kaem ko kuwim laili mu ningi baga se den imi balam, “Ani amilmil te, sail te Shechem ali mu pakakumurik, ale sor wolong Succoth mu karogo tala parusuwu aga kariimet nungaru gurugekko.

⁷Gilead mu aninga; se Manasseh mu aninga; Ephraim mu aninga kager ko kitigat; se Judah mu aninga bitua ura ko tam.

⁸Moab mu tawir yam bo iwita; se Edom mu aninga asiwik gomang te bitirikko; se Philistia ningi mu ani amilmil ngata te bitirikko.”

⁹Bare aga Kaem, awiri ani agarak sor Edom mu te namaruk ale ko wonong sokel aora garagar mu ningi agarak kaparukko?

¹⁰Awiriya bo mena, mu am nigita. Ni biring gurugu nangarem ale kager te me nanga sangarukasam.

¹¹Bare aitak mu ni ana nanga sangaruko; mu awuk, ali ko kari bo ana nanga sangukko me terong.