Psalms 55:11-22

¹¹Munan memek duap duap barasam ale wonong tuagu ninguru maguwuram; kariimet nguangara tua ale kote mel gia, se kawel ko munan sor lilim iram.

¹²Aninga kager kari memek alo nunga bo ago ko bala memek balam le mu, ani ko ikia tawun biya me aga moso le. Agi nu numi biya ko iki se ani kituwura ko aga beteso le mu, ani am abiring tui namasam le.

¹³Bare mena. Mu nigita, kari aninga turan tala, aninga bagara suan se aga yawara, nigita munan owore bitakasam.

¹⁴Ni analak nanimi ninguru gikasan, ale kariimet sang nongorak Kaem ko temple ningi namakasan ale Kaem nup patawukasan.

¹⁵Aga bita maguwura ko kari alo mu kuera mateng nunga iluwok se marak loaga se kari kuera nunga mutim ningi kapamonko! Mu awuk, nononga nongomang motam se nunga bagara mu kiwem memek karogo terong ma saparam.

¹⁶Bare ani Yawe, aninga Kaem, mu aurik se nu aninga bataguru taukko.

¹⁷Turomola, woremkalal, bainga ningi ani ikup yaman ningi nia kika lagasam, se nu agiring ikiok ale aga sangukko.

¹⁸Suen biya agarak kagersan, bare ani ikup bo me arigekko, mu awuk, nu aga bituok ale aga bataguru taukko.

¹⁹Kaem, king ko pempem la baga lagoso, mu aga niara ikiok ale aga kager kari nunga menawurokko; mu awuk, nuna nu ko me nguangasan, ale nunga munan memek mu ko me giris palagasan.

²⁰Aninga tiran yawara mu noko sikisaki ikup ningi nunga waram; ale anananga ikia kaloman mu kulukam.

²¹Kuring te mu den welang welang balso, bare gomang motam ningi mu kager ko tama iwita kaniwoso; noko den mu malin kaukoyam ikiko, bare den mu batir iwita nanga bataguruwoso.

²²Nika ikup suen la Yawe kuting te bitarko, se nu giok ale nu nika sangukko; nu kariimet ningo diram mu nungarkiwuruk se memek bo me arigimonko.