Psalms 51:8-17

⁸Ni aninga angimik asokel menawurem, bare aitak ni aninga sangaru se aking amilmil te bagarikko.

⁹Ni aninga betera memek mu biring tui ale aga memek siwu waruko.

¹⁰O Kaem, angamang motam nikim iru tuiko; ale sokel iru angamang motam ningi bitar se ani ni kerak la bagarikko.

¹¹Ni ka motam te me aga kau sarumu saparko; ale ka Bur Laili aninga ningi mu me tagi bataguru toko.

¹²Aga sangaru tata ko amilmil mu akingtala angamang motam ningi bitarko; aninga ikia sangam aisu, se ani te ni bowa ningi la baga se lagarikko.

¹³Mu te ani memek betera kariimet alo mu nika munan nunga kausek se giris palagamon kiring karo tumonko.

¹⁴O Kaem, ni aninga Saonga Kari, gue agiting te aniso imi siwur se ani amilmil te nika munan ningo dirkiriyam mu ko wur iluwekko.

¹⁵Kari Biya, aga sangaru se ka nip biya patawurikko.

¹⁶Ani te tama bita kisa ko sipsip mel ta kete karogo tairik, bare ni mu ko me uririkisam; ani tama bita kisek ta, bare nika gemang motam tawun biya te me aniso tala.

¹⁷O Kaem, tama bita kisa ko munan ni ko kuesam mu iwita: kari ko memek ari ko ikiso ale ko gomang ninguru batagoso; munan o ta umutang ni ko kuesam ale me biriruwusam.