Psalms 50:2-18

²Be mat ram’en Got u Zion, fare binaw ndariy thibngin ngaf ni fel’usun.

³Got rodad e be yib, machane gathi be yib ndariy lingan; ya bay ba nifiy ni be daramram nib m’on rok, ma bay bangi yoko’ ni ba liyeg.

⁴Be pining e tharmiy nge fayleng ni ngar mangew mich ni yow be guy ni be pufthinnag e girdi’ rok.

⁵Be ga’ar, “Mu kunuy ngog e girdi’ rog nib yul’yul’, ni pi’in nra ngongliyed ba m’ag u thilmad ko maligach nra pi’ed.”

⁶Tharmiy e be weliy feni bmat’aw Got, ya ir e ma pufthin.

⁷“Mmotoyilgad, e girdi’ rog, ya nggu non; Israel, gur e bay gu welthin nib togopluw ngom. Gag Got, ni Got rom.

⁸Dagur puwan’ ngomed ni bochan e pi maligach romed nge pi maligach ni mo’oruf ni gimed be fek i yib ngog ni gubin ngiyal’.

⁹Dawor gum’ ni bochan e pi garbaw ni pumo’on ko yungi milay’ romed ara pi kaming u fithik’ e yuran’ i gamanman romed;

¹⁰ya gubin e gamanman u loway e ba milfan ngog nge garbaw u daken yu biyu’ i burey.

¹¹Urngin e arche’ ni malboch e ba milfan ngog nge urngin e ban’en nib fos u lan e flang.

¹²“Fa’anra manga kug k’iy, ma dab gu man ggan ngomed, ya fayleng nge urngin ban’en riy e bmilfan ngog.

¹³Gur, gu ma longuy ufin e garbaw ni pumo’on, ara gu ma unum racha’en e kaming?

¹⁴Ogmagaer e nge mang maligach romed ngak Got, mu pi’ed ngak e en ni Gubin ma Rayag Rok gubin e tin ni kam og niged.

¹⁵Mu piningedgag ko ngiyal’ nra yib e oloboch; mu gu lufmed riy, ma bay mu pininged e sorok ngog.”

¹⁶Machane be ga’ar Got ngak e pi’in kireb, “Mang mat’awunmed ni ngam uned i yog e pi motochiyel rog, ara mang rogmed ni ngam weliyed murung’agen e m’ag rog?

¹⁷Ka mu siyeged e fonow rog; ka mu n’iged e tin kug ta’chiylen.

¹⁸Gubin e pi moro’ro’ ni gimed ra guy me mang fager romed, ma gimed ma m’agmed ngak e pi’in dar yul’yul’gad ko mabgol rorad.