Psalms 48:1-13

¹(Korah ko kuriang alo nunga wur bo) Yawe nu Biya! Noko wonong te bagoso umu ningi nup biya pempem to lagarukko! Kaem ko duruk laili mu

²kalel biya se yawarakala, se ali imi ko kariimet suen la ko amilmilasan. Duruk Zion mu koma north mu te aniso, mu King Biya wore ko wonong.

³Kaem kota ko kager ko yumura kuwim aora bibiya mu ningi baga se, ko kariimet nunga bitarso ale ninguru nunga sinar taso.

⁴Sor saki ko king nunumi gikasan ale Kaem ko wonong mu ilak kagermonko taikasan, duap te ilu biguwukasan,

⁵bare tom wonong mu arikasan mu nguangakasan ale nagukasan.

⁶Nuna imet kuriang iluwokko yaman taso ale numi tagi gurungumuso ale nguangoso iwita, nguangara nunga iluwam.

⁷Se Kaem nuna sor Tarshish ko dal bibiya, daula worem bausa te taira ale nunga maguwura iwita, nunga maguwuram.

⁸Yawe Sokel Garagar ko wonong te mel bitakaso se ana nadogowa iki lagaram mu, aitak ana namotam te arigiman: nanga Kaem mu ko wonong bitarso, se pempem ningo la baga lagoso.

⁹Anananga Kaem, ana nika temple ningi kapasan mu, ana nika kua nangara ko munan mu ko iki gurugu se amilmil kisisan.

¹⁰Nika kiting sokel garagar mu ali lilim te kager bibiya menawusam, ale munan diram la betesam, se nika nip biya mu sor suen la te patawusan.

¹¹Duruk Zion te amilmil barasoso, se Judah sor lilim la nonoman nungeso, mu awuk, ni ka munan ningo diram wore te nunga sangaru taem.

¹²O kariimet, Zion wonong lilim ko por kaloman mu duap kaoral geragal ale ko kawam kalel bibiya mu ari gurugalko;

¹³ale ko kager ko yumura kuwim aora bibiya mu ago arigalko; mu awuk, nina mel arigiman mu suen la gue udagi taiwasan mu nuguring te beteralko.