Psalms 45:3-17

³Pira won omui kodlaj ni lonelon omui, komui ol komad, o kapwata kin komui!

⁴Komui en pwaida ni omui kapwat. Kom kotiwei, pwen jauaja me melel, o me luet akan, pwen kolekol on ir me pun. Lim omui maun ap pan wia dodok kapuriamui.

⁵Kananan omui kajik katieu me kon — wei kan kin lodi on komui —; re kin lel on nan monion en imwintiti en nanmarki.

⁶Main Kot, mol omui pan duedueta kokolata; o jokon en wei omui me jokon en pun apot.

⁷Kom kin pok on me pun ap tataki tiak jued; i me Kot, omui Kot, keie kin komui le en kaperen mon omui warok kan.

⁸Omui likau kan kin pomauki mire, aloe, o kajia ni omui pedoi jan tanpaj omui im elpenpain, komui kin polauleki kaul o arp.

⁹Japwilim en Nanmarki jeripein ko mi nan pun en toun tanpaj omui; li Nanmarki a kotikot ni pali maun omui kapwateki kold en opir.

¹⁰Nai jeripein koe ron, o kilan, o kapaikedi jalon om, o monokela jap om o jau om akan.

¹¹Nanmarki ap pan peren kida mom om kajelel; pwe i om Kaun, a koe en kaudoki on i.

¹²Nain Tiruj, me kapwapa re ’rail pan wado kijakij; o nidinid re om.

¹³Japwilim en Nanmarki jeripein, me mi lole, meid kajelel ni monion i, a kapwateki likau kold.

¹⁴A pan pakaluala ren Nanmarki ni a likau linan o a warok peinekap akan, me idauen i, kompoke pa, pan kalua don komui.

¹⁵Re pan kalua irail ki peren o nijinij, o re kin pedelon on nan tanpaj en Nanmarki.

¹⁶Noumui manakap akan pan wiliandi jam omui kan; i me kom pan kajapwiladan jaupeidi en jap akan karoj.

¹⁷I pan tamanda mar omui ni di kan karoj; i me wei kan karoj pan kapina komui kokolata.