Psalms 44:3-25

³Nuna nongota nunga kager ko mel te, agi nongota nunga nosokel te ali mu me bataguru taman, mena; bare mu nika kiting, nika sokel te, se ka kimik nikim mu te kager mu menawurem; mu awuk, ni ka gemang motam ka kariimet ko aniram se uwutata beterem.

⁴Ni aninga Kaem se aninga King; ni balsam se ana Jacob ko kariimet gue kager te marirasan.

⁵Nika sokel te ana nanga kager kari nunga karosan; nika nip te la ana kager nunga sail menawusan.

⁶Ani aga gatu mare karogo, bare umu te la me ira sanamasam; se aga saenang karogotala, bare mu te la betela me marirasam.

⁷Bare ni nanga sangorsam se kager me nanga maguwuso; ni kariimet me nanga kuesan mu ngual nungarsam se dolasan.

⁸Se Kaem, ana nika saonga mu ko ka balu patawu lagasan, ale nika nip pempem la patawu se laganakko.

⁹Bare aitak ni biring gurugu nangarem ale nanga ira kutuwurem; ale aitak ni anananga kager kari kager te me nunga sangorsam.

¹⁰Ni uwuta beterem se ana kager arigiman ale naguman, se nuna anananga melmasak gi gilingiman.

¹¹Ni ana sipsip nunga momon se kuemonko negawasan iwita nanga beterem, ale nanga parusuwurem se ngual ngual namaman ale kariimet iwareng nunga ningi bagasan.

¹²Ni ana ka kariimet nanga merem ale diara kari iwareng nongote nanga ilu arigem, se manga koma aliti ta te nanga diaman iwita, ni manga bo biya nongote me taem.

¹³Ni uwutata nanga beterem, se kariimet nangimik duap te bagasan mu nanga balu maguwusan; kariimet saki mu nanga gusirsan ale den dolara nanga manorsan.

¹⁴Ni buta maem se sor saki ko kariimet den dolara nangimik ko balsan; ale kiwem nago ko aratam ewere ko ninguru gusisan.

¹⁵Se ani pempem la aimi ari maguwu lagasam, se dolara mu angama sengem te aniso,

¹⁶mu awuk, kariimet agarak kagersan mu dolara den aisu lagasan, ale agarki maguwusan ale aga gusirsan.

¹⁷Munan memek imi suen la nangimik te aratu saparam, bare ana ni ko ko nangamili me sapakaso, ale ni ikia den nangarak kalem mu me kulukurukasan tala.

¹⁸Ana nabiring gurugu me kisiman, ale nika munan se nika lage nangarem mu nabiring me tuman.

¹⁹Bare ni anananga maguwurem ale kausik diwang nunga ningi nanga awurem; ale tiromorom biya te nanga iramurem.

²⁰Ni anananga Kaem, se ana nika nip me ko nangamili saparam; ana nagiting patawuman ale kaem kawel bo ko me ngatangaman.

²¹Uwutata beteman le, mu ni am ko iki saparko tala, mu awuk, ni anananga ikia yumura mu ni yam ari iki sapasam.

²²Ana nika kariimet ko bagasan, se tom suen biya nanga mosan se kuawasan; ana nangarkasan mu sipsip nunga momon se kuemonko lage te bagasan mu iwita nangarkasan.

²³Kari Biya, baresko! Ni anape ko aniwasam? Ni baresko! Ni biring nangara biya me nangaruko!

²⁴Ana nanga bita maguwuman se ikup tawun biya ningi bagasan, bare ni anape ko ana nago ko kema kaluwusam ale kamili sapakoyam bagasam?

²⁵Ana ali te dagulu parasaman ale kariimet kuera iwita aniwasan.