Psalms 44:1-19

¹MAIN Kot, je roner ki jalon at, jam at oko kajokajoi on kit er, me kom kotin wiadar ni ar anjau maj.

²Kom kotin pakiweier men liki kan ki lim omui, ap wilian ir di; kom kotin koko jan wei kan, ap id katotoe ir ala.

³Pwe re jota kaloedier jap o ki ar kodlaj, o pa arail jota katepa on ir, pwe pali maun omui o lim omui, o marain en jilan omui; pweki kom kotin kupura irail er.

⁴Pwe komui Kot ai Nanmarki, me inauki on Iakop, en jauaja i.

⁵Komui, me je pan kawekila at imwintiti kan; ni mar omui me je pan tiakekidi me kin palian kit.

⁶Pwe i jota kin kaporoporeki ai kajik katieu, o ai kodlaj jota kak dore ia la.

⁷Pwe komui me kin jauaja kit jan at imwintiti kan, o kom kin kanamenokala, me kailon kin kit.

⁸Ran karoj je pan kapina Kot, o je pan danke on mar omui kokolata. Jela.

⁹Ari jo, kom kotin likidmalie kin kit ala, pwe jen lijela, o komui jota ian at karij akan.

¹⁰Kom kotin mueid on at imwintiti, ren paki kit wei, o me kailon kin kit, kin kulia jan at kapwa.

¹¹Kom kotin mueid on ir, ren kawe kit ala dueta jip oko, o kom kotin kamueit kit pajan nan pun en men liki kan.

¹²Kom netikila japwilim omui kan ni pwai jued, a komui ap jota kapwapwa kilar.

¹³Kom kin kotin wiai on kit, jen kankaurur ren men imp at, o lalaue o jarodi ren me kapil kit pena.

¹⁴Kom kotin wia kin kit karajepa eu ren men liki kan o aramaj akan kin dueduälok kin kit.

¹⁵I kin jaro nin ran karoj o maj ai me dir en namenok,

¹⁶Ni ai roneron aramaj morjued o lalaue, o ni ai kilekilan ai imwintiti o me kin akdepuk kan.

¹⁷Mepukat karoj lel don kit er, ari jo, je jota kak monokela komui, de wia dip on japwilim omui inau.

¹⁸Monion at jota pupwei jan komui, o je jota wuki wei jan al omui.

¹⁹A komui kawe kit alar ni wajan man jued, o kom kadupale kidi mot en mela.