Psalms 44:1-19

¹A Got, ku gu rung’aged nga telmad, pi chitamangimad kakrom e kar weliyed ngomad murung’agen, feni sorom ko pin’en ni um rin’ u nap’rad, ko fapi rran ni kakrom:

²rogon ni go’ gur ma ga tuluf fa pi girdi’ ni dar nanged Got nga wuru e nam rorad, ma ga tay e tirom e girdi’ nga taferad ngar suwyed; nge rogon ni mu gechignag boch e nam, ma ga gagiyegnag e girdi’ rom nge fel’ rograd.

³Pi girdi’ rom e dar gelgad ko fare nam ni bochan e saydon rorad; ma ku gathi gelngirad e ra gelgad riy; ya ra gelgad u daken gelngim nge fenam gel, ya ga bay rorad, ni aram e be dag ni yad ba t’uf rom.

⁴Gur e pilung rog nge Got rog; ga ma gelnag e girdi’ rom,

⁵u gelngim e gu gelgad riy ko pi to’ogor romad.

⁶Gathi gat’ing romad e be pagan’mad ngay ara saydon romad ni nge aywegmad;

⁷machane gur e mu ayuwegmad rok e pi to’ogor romad, ma ga waernag e pi’in yad be fananikaymad.

⁸Bay u gogned e sorok ngom ni gubin ngiyal’ mu’ug pininged e magaer ngom ndariy n’umngin nap’an.

⁹Machane, chiney e kam digeymad ma kam pagmad kug waergad; dakmur un ngak e pi salthaw romad ko mael.

¹⁰Kam pag kug milgad rok e pi to’ogor romad, ma kar feked e tiromad karfaned.

¹¹Kam pagmad ni ngan li’mad ni bod e saf; kam weregmad ko pi nam i yan.

¹²Gur e kam pi e girdi’ rom ni chuway’ nib achig puluwon ni gowa dariy fel’nginrad ngabang.

¹³Pi’in gamad buguliyoror e kar guyed e n’en ni kam rin’ ngomad, ya yad be moning ma yad be minmin ngomad.

¹⁴Kam tabnathin nagmad ku gu makak’argad u fithik’ e pi nam; yad be chichingeg lolugrad ngomad ni yad be girig.

¹⁵Gubin ngiyal’ nib m’ayfag; ku gum’ ko tamra’

¹⁶ni fan e moning nge thin ni kireb ni gu be rung’ag rok e pi to’ogor rog nge pi’in dubrad dakenag.

¹⁷Gubin e pin’ey nike buch ngomad, ni yug aram rogon ni dawor gu paged talinem ara gu th’abed fare m’ag ni mu ngongliy u thildad.

¹⁸Gubin ngiyal’ ni ga bay u lanin’mad ma gamad be rin’ e n’en ni mu machibnag.

¹⁹Machane ka mu pagmad u fithik’ e gamanman ni malboch ni de yag ni nggu ayweged gamad; kam digeymad u fithik’ e rumug.