Psalms 34:5-17

⁵Kariimet nu kote la loaga lagasan mu nungumik guyak aso; nuna dolara mu me nunga ira kaluwurokko.

⁶Ani ikup biya ningi kaperem ale nu aurem se nu ani agiring ikiam, ale aga ikup suen la te aga saongam.

⁷Ikialko. Yawe ko engel mu kariimet noko nguangasan umu nunga laturso ale nunga sangaru taso.

⁸Yawe kau to arik ale asele ko ningo nuam mu arikko; kariimet noko ningi yumusan mu amilmilamonko.

⁹Nina noko kariimet alo, noko nguangaralko, mu awuk, kariimet nu ko nguangasan, mu mel bo ko me tukunangamonko.

¹⁰Lion mu tom saki na ko kuesan ale nungumik sail menaso; bare kariimet Yawe kote loaga lagasan mu mel ningo bo ko me tukunangamonko.

¹¹Aninga kuriang alo, tairalko, tairal ale agiring ikialko; ani ninga kausek se Yawe ko nguanga se pempem la bowa ningi bagaralko.

¹²Nenenga ningi awiriya marak baga se lagarukko kueso, ale ko gomang tom ningo ningo taiwoso mu arigokko agi mu,

¹³kuring kuamili te den memek bo me baluk, ale kore sumulak te den kawel me ta balukko.

¹⁴Nina kiwem memek nibiring tual ale kiwem ningo la beteralko; bagara welang se lila mu nengemang tual ale ko nisipiling diruwuralko.

¹⁵Yawe ko motam mu kariimet diram mu nungarkiwoso, ale nunga aira ko dogowa gurugu lagoso;

¹⁶bare kariimet memek betesan, mu nu buring gurugu nungarso, ale nunga menawuso se udagi kariimet bo me ta nunga ikiso.

¹⁷Kariimet ningo diram mu niasan se Yawe nuguring iluso; nu nunga ikup suen la te nunga sangaru taso.